د اروپايي اتحادیې د بهرنیو چارو وزیرانو د دوشنبې په ورځ وویل، چې د اروپایي اتحادیې د بهرنیو چارو وزیرانو پر سوریې د بندیزونو د کمولو لپاره پر یوې طرحې موافقه کړې ده.
د دوی په وینا، که ناسم ګامونه واخیستل شي نو د بندیزونو لرې کول بېرته راګرځېدلی شي.
اروپايي اتحادیه په سوریه کې د افرادو او اقتصادي سکټورونو په نښه کولو لپاره یو لړ بندیزونه لري.
په دې بندیزونو کې د سوریې د تېلو صادراتو بندیز او نړۍوالو مالي چینلونو ته د لاسرسي محدودیتونه شامل دي.
خو اروپايي پلازمینې دمشق ته د خپل چلند بیا ارزونه وروسته له هغې پیل کړه، چې بشارالاسد د ډسمبر په میاشت کې د "حیات تحریر الشام" په مشرۍ د اپوزیسیون ځواکونو له خوا د ولسمشر په توګه له واکه لرې شو.
د سوریې د بهرنیو چارو وزیر اسد الشیباني پر سوریې باندې د بندیزونو د کمولو په اړه د اروپايي اتحادیې د پرېکړې هرکلی وکړ او دا یې یو مثبت ګام وباله.
د اروپايي اتحادیې حکومتونه غواړي، چې د سوریې د بیارغونې په پیل کې مرسته وکړي، خو ډېری پلازمېنو ټینګار کړی، چې اروپايي اتحادیه باید د ګټې ساتلو لپاره تدریجي او بېرته راګرځېدونکی چلند وکړي، ځکه چې دا په دمشق کې نوي چارواکي هڅوي چې بنسټیزو حقونو ته درناوی وکړي او ټولګډونه پالیسۍ پلي کړي.
