د روغتیا نړۍوال سازمان یوې لوړ پوړي چارواکې وویل، چې د متحده ایالاتو له لورې پر روغتیا نړۍوال سازمان باندې د مرستو بندول به په افغانستان کې د پولیو کمپاین سخت اغیزمن کړي.
حنان بلخي د چهارشنبې په ورځ خبرداری ورکړ، چې افغانستان او پاکستان یوازیني هېوادونه دي چې د پولیو ویروس په کې پاتې دی او د متحده ایالاتو له خوا د تمویل ځنډېدل له ګواښ څخه خالي نه دي.
د ختیځې مدیترانې هېوادونو لپاره د روغتیا نړۍوال سازمان مشرې حنان بلخي په یوه انلاین خبري کنفرانس کې د امریکا پر مهم رول ټینګار وکړ.
حنان بلخي د دغه سازمان څخه د متحده ایالاتو د وتلو په اړه خپلې اندیښنې شریکې کړې او زیاته یې کړه چې دا به په افغانستان کې ارزښتناکه نفوس په جدي توګه اغیزمن کړي.
د روغتیا نړۍوال سازمان دغې چارواکې وویل، چې د پولیو واکسین د هېواد لپاره حیاتي دی او باید د ناروغۍ د نورو پیښو څخه د مخنیوي لپاره دوام وکړي.
تېره اونۍ، د متحده ایالاتو ولسمشر ډونالډ ټرمپ په بې ساري ډول د نږدې ۹۰ ورځو لپاره د ټولو بهرنیو مرستو د ځنډولو امر وکړ ترڅو د هغه ادارې ته دا وخت ورکړي چې ارزونه وکړي چې ایا متحده ایالات د ډېری بشردوستانه، پرمختیایي او امنیتي پروګرامونو تمویل ته دوام ورکړي او کنه.
یاده دې وي چې ډونالډ ټرمپ د ملګرو ملتونو اداره د کوېډـ۱۹ وبا او نورو نړۍوال روغتیایي بحرانونو په ناسم مدیریت تورنه کړې.
