د پاکستان د بهرنیو چارو وزارت وياند شفقت علي خان په رسنیز کنفرانس کې ویلي، چې په افغانستان کې د تحریک طالبان پاکستان (ټي ټي پي) شتون یوه جدي ستونزه ده او دغه ستونزه یې بار بار له طالبانو سره شریکه کړې.
تازه د ملګرو ملتونو د څار ټیم په خپل یوه نوي راپور کې ویلي، چې پاکستاني طالبانو (ټيټيپي) او جماعت انصارالله (جياې) په افغانستان کې د القاعدې او افغاني طالبانو په مرسته نوي روزنیز مرکزونه جوړ کړي دي.
د بهرنیو چارو وزارت ویاند شفقت علي خان ویلي، چې پاكستان په پرله پسې توګه د افغانستان له حکومت څخه د ترهګرو په ضد د اقداماتو غوښتنه كړې.
پاکستاني چارواکي ادعا کوي، چې وسله والې ډلې په افغانستان کې پټنځایونه لري او په پاکستان کې بریدونه ترسره کوي.
طالبانو که څه هم په افغانستان کې د پاکستاني طالبانو شتون نه ردوي خو په پرله پسې ډول دا تورونه چې له افغانستان څخه وسله وال په پاکستان کې بریدونه کوي رد کړي او ټینګار کوي چې هېچا ته به اجازه ونهکړي چې د افغانستان له خاورې څخه د بل هېواد پر ضد اقدامات ترسره کړي.
