د پاکستان د بهرنیو چارو وزارت وياند شفقت علي خان په اوونيزه رسنیزه ناسته کې وویل، چې پاکستان د متحده ایالاتو لهخوا هند ته د پرمختللې ټکنالوژۍ پر مټ سمبالو وسلو په ورکولو اندېښمن دی.
د متحده ایالاتو ولسمشر ډونالډ ټرمپ د هند لومړي وزیر نریندرا مودي سره په لیدنه کې وویل، چې نوي ډيلي ته به ایف-۳۵ جنګي جیټ الوتکې ورکړي.
ډونالډ ټرمپ زیاته کړه، چې پر هند به د میلیونونو ډالرو په ارزښت پوځي تجهیزات هم وپلوري او همدا راز به هند له امریکا د تېلو او ګازو په واردولو کې زیاتوالی راولي چې له دې سره به د سوداګرۍ کسر کم شي.
پاکستان چې له هند سره د کشمیر په سر له اوږدې مودې شخړه لري د متحده ایالاتو لهخوا هند سره په دغه تازه تړونونو اندېښه ښکاره کړې او دغه پرمختللې وسلې او ټکنالوژي د خپل هېواد په تاون ګڼي.
د افغانستان د کرېکت ملي لوبډلې د اتلانو جام له سياليو وړاندي په لومړۍ تمريناتي لوبه کې د پاکستان الف شاهین لوبډلې څخه د ۱۵۰ منډو په توپير ماتې وخوړه. د کرېکټ اتلانو جام سيالیو ته د تياري لپاره افغانستان د یکشنبې په ورځ د نيوزلنډ لوبډلې سره دويمه تمريناتي سيالي هم لري.
د افغانستان کرېکټ ملي او د پاکستان شاهين الف لوبډلو ترمنځ په تمريناتي سيالۍ کې پاکستان لومړۍ توپوهنه وکړه.
د پاکستان لوبډلې په پنځوس اورونو کې د خپلو ۸ لوبغاړو په سوځېدو افغان ملي لوبډلې ته ۳۱۵ منډې هدف وټاکه.
په افغان لوبډله کې فريد احمد ملک ۳، عظمت الله عمرزي او نور احمد دوه، دوه او ننګيال خروټي یو لوبغاړي وسوځول.
افغان لوبډلې د سيالۍ په دویمه برخه کې ۱۶۴ منډې جوړې کړې او دغه لوبه یې د ۱۵۰ منډو په توپير وبایلل.
دغه تمريناتي سيالي د پاکستان په لاهور کې تر سره شوه.
افغان لوبډله د يکشنبې په ورځ خپله دويمه تمريناتي سیالۍ د نيوزلنډ لوبډلې سره کوي او وروسته به د اتلانو جام سياليو کې برخه واخلي.
د پاکستان د بهرنیو چارو وزارت وايي، شهباز شریف او رجب طیب اردوغان په افغانستان کې د ټول ګډونه حکومت پر جوړولو، د ښځو او نجونو د حقونو په تامین او له ترهګرۍ سره پر مبارزه ټینګار کړی دی.
د ترکیې ولسمشر رجب طیب اردغان د چهار شبنې په ورځ په دوه ورځنې سفر اسلام اباد ته ورسید او پاکستاني چارواکو یې ګرم هرکلی وکړ.
پاکستان ته د اردوغان د دغه سفر پرمهال د دواړو هېوادونو د مشرانو ترمنځ د افغانستان په اړه هم خبرې شوې دي.
د پاکستان د بهرنیو چارو وزارت ویلي، چې د پاکستان لومړي وزیر شهباز شریف په افغانستان کې د ترهګرو ډلو د فعالیتونو په اړه خپلې اندیښنې د ترکیې له ولسمشر رجب طیب اردوغان سره شریکې کړې دي.
د ترکیې له ولسمشر سره په کتنه کې د پاکستان لومړي وزیر ویلي، چې اسلام اباد تمه لري چې افغان طالبان د ترهګرۍ پر وړاندې په مبارزه کې له پاکستان سره همکاري وکړي، نه دا چې ترهګرۍ ته لمن ووهي.
د پاکستان او ترکیې په ګډه اعلامیه کې د پاکستان لومړي وزیر شهباز شریف او د ترکیې ولسمشر رجب طیب اردغان د سوله ییز افغانستان د پرمختګ پر ملاتړ ټینګار کړی دی.
په دغه ګډه اعلامیه کې د دواړو هېوادونو مشرانو په افغانستان کې د ټول ګډونه حکومت پر ازرښت، د اساسي حقونو درناوي او په ځانګړي توګه د نجونو او ښځو د حقونو او د افغانانو لپاره د دوامداره بشري مرستو پر اړتیا ټینګار کړی دی.
په اعلامیه کې ویل شوي، چې طالب چارواکي باید له ترهګرۍ سره په کلکه مبارزه وکړي.
په دغه ګډه اعلامیه کې ویل شوي، چې طالبان دې له ترهګرۍ سره د مبارزې لپاره د تحریک طالبان پاکستان په ګډون له داعش ډلې سره چې د ملګرو ملتونو د بندیزونو په نوملړ کې شاملې دي ټول اړین ګامونه پورته کړي.
شهباز شریف او رجب طیب اردغان ټینګار کړی او ویلي یې دې، چې افغانستان باید د ترهګرو ډلو لپاره په خوندي ځای بدل نه شي.
د طالبانو واکمنېدو او پاکستان کې د وسلوالو بریدونو ډېرېدو سره اسلام اباد افغان طالبان د دغه هېواد ضد وسلوالو ته د پټنځیو په ورکولو تورنوي.
افغان طالبان دا تور ردوي او وايي چې پاکستان د افغانستان ضد داعش ته مرکزونه ور کړي دي.
رويټرز خبري اژانس وايي، پاکستان د کرېکټ اتلانو جام په کوربتوب سره هیله لري، چې د دغه هېواد په اړه د ناامنۍ اندېښنې له منځه یوسي او سیاحت او پانګونې ته زمینه برابره کړي. له ۳۰ کلنو وروسته پاکستان د کرېکت د داسي یوه جام کوربه دی.
رويټرز خبري اژانس د جمعې په ورځ په پاکستان کې د کرېکټ اتلانو جام پيلېدونکو سيالیو اړوند ويلي، چې دغه هېواد هڅه کوي په دې لوبو سره امنيتي او سیاسي وضعت جوړ وښیي.
د پاکستان حکومت په دې سره غواړي، چې دغه هېواد ته د سیاحت او پانګونې په برخه کې د خلکو باور زيات کړي.
د کرېکټ اتلانو جام راتلونکې اونۍ پيليږي.
رويټرز په خپل خبر کې ویلي، چې د پاکستان حکومت او کرېکټ بورډ ته له لسیزو وروسته د دغه یو ورځنيو سياليو له لارې د خپل هېواد د ټیکاو د غوره انځور وړاندې کولو فرصت په لاس ورغلی.
د پاکستان کورنيو چارو وزير او د کرېکټ بورډ مشر محسن نقوي، چې پر یوه مهال دوې دندې مخ ته وړي د دې سياليو اړوند وایي: « پاکستان ته د نړيوال کرېکټ راستنېدل یوازي د لوبو کوربتوب نه دی، دا د ویاړ راګرځول و د ملي جذبې راپارول او بېرته یې هغو ميليونو خلکو ته ورکول دي، چې د پاکستان کرېکټ سره ولاړ دي.»
د پاکستان په لاهور کې په ۲۰۰۹ کال د سريلانکا کرېکټ لوبغاړو پر بس وسله وال بريد وشو، چې شپږ لوبغاړي په کې ټپيان شول او له دې وروسته دغه هېواد ته د نړيوالو لوبغاړو تګ بند شو.
پاکستان پرله پسې د امنیتي وضعت د کابو کولو هڅې وکړې ا له ۲۰۱۸ کال بیا دغه هېواد ته د بهرنيو لوبغاړو او لوبډلو سفرونه پيل شوي.
د پاکستان په کوربتوب له هند لوبډلې پرته نيوزلنډ، انګلنډ، اسټراليا، افغانستان، سویلي افريقا او بنګلدېش په دغه هېواد کې لوبې تر سره کوي.
هند پر پاکستان تور لګوي، چې د وسله والو ډلو ملاتړ کوي؛ خو اسلام اباد دغه تورونه ردوي.
د پښتونخوا لکي مروت ولسوالۍ قومي جرګې د پاکستان اټومي انرژۍ کمېسیون د تښتول شویو کارکوونکو د خوشې کېدو لپاره «ټي ټي پي» ته درې ورځې وخت ورکړ. دغې جرګې وسله والو ته ګواښ کړی، که یې غوښتنه ونه منل شي، د سیمې خلک به د دوی په وړاندې بل اقدام وکړي.
جرګه د پنجشنبې په ورځ د (سلواغې ۲۵مه) د لکي مروت په کبیر پارک کې را بلل شوې وه، چې په کې د سیمې د ناسم امنیتي وضعیت او د ترهګرۍ د زیاتوالي په اړه خبرې وشوې.
په جرګه کې د پخواني وفاقي وزیر انور سیف الله خان، د پاکستان قامي اسمبلۍ پخواني غړي نصیر محمد خان مایدخېل، د قامي اسمبلۍ غړي شیر افضل مروت، پخواني وفاقي سکرتر اختر منیر مروت، د صوبایي اسمبلۍ غړو جوهر محمد خان او د طارق سعید خان تر څنګ یو شمېر نورو ځایي مخورو هم ګډون کړی وو.
د جرګې غړو د نا امنۍ او ترهګریزو بریدونو د زیاتوالي له امله ژوره اندېښنه وښوده.
دوی وویل چې دا جرګه د تښتول شویو کسانو د خلاصون، د امنیتي ادارو د رول او د سیمې د امنیت د ټینګښت لپاره راغوښتل شوې وه.
پخواني وفاقي وزیر انور سیف الله خان له مرکزي او صوبایي حکومتونو وغوښتل چې د یرغمل شویو کسانو د خوشې کولو لپاره بېړني او جدي اقدامات وکړي.
هغه زیاته کړه، چې قومي مشرانو څو ځله جرګې کړې خو اوس د عملي اقداماتو وخت رارسیدلی دی.
یو بل قومي مشر نصیر محمد خان میادخیل خبریالانو ته وویل، چې طالبان له بلې سیمې نه دي راغلي، بلکې د همدې ولسوالۍ اوسېدونکي دي او باید د تاوتریخوالي ناسمه لاره پرېږدي.
هغه د جرګې ګډ پرېکړه لیک هم ولوست او اعلان یې وکړ چې تښتول شوي کارکوونکي د همدغې سیمې د طالبانو په ولکه کې دي.
هغه زیاته کړه: «موږ طالبانو ته درې ورځنی ضرب الاجل ورکړی، چې ټول یرغمل شوي کسان د مروت قبیلې ته وسپاري، که داسې ونه شي، نو قبیله به د پښتني دودونو له مخې اقدام وکړي.»
نصیر محمد مایدخېل خبره، امنیتي ادارې دې هم د مروت قبیلې ټول بې ګناه کسان په درې ورځو کې ژر تر ژره خوشې کړي.
هغه همداراز د هغو کسانو لپاره د نغدي مرستو غوښتنه وکړه چې د ترهګرۍ په وروستیو پېښو کې یې خپل ژوند له لاسه ورکړی.
کابو میاشت وړاندې پاکستاني طالبانو په لکي مروت کې د پاکستان د اټومي انرژۍ اته کارکوونکي برمته کړل چې لا یې هم برخلیک نه دی معلومات او «ټي ټي پي» د دغو کارکوونکو یوه ویډیو هم خپره کړې وه چې په کې برمته شویو کسانو د پاکستان له حکومته غوښتي وو، چې د یادې وسله والې ډلې غوښتنې دې د دوی د خلاصون لپاره ومني.
د جمعې په ورځ د (سلواغې ۲۶مه) پاکستاني رسنیو خبر ورکړی، چې د دغه هېواد د بلوچستان ایالت په هرنایي سیمه کې د ماین په چاودنه کې لس کان کیندونکي وژل شوي او شپږ ټپیان دي. ویل کیږي، د کان کیندونکو موټر په یوه ماین ختلی او دغه پېښه رامنځته شوې.
په سیمه کې سرچینو ویلي، دغه پېښه هغه وخت رامنځته شوه کله چې د سکرو د کان کیندونکو یو موټر د سړک غاړې په ماین ور برابر شو.
ځايي چارواکي وايي، چې دغه چاودنه د هرنايي په سیمه کې شوې او د دې پېښې د څرنګوالي په اړه یې پلټنې پیل کړې دي.
بلوچستان چې د پاکستان له نا ارامه ایالتونو څخه ګڼل کېږي، چې په وروستیو کلونو کې د ګڼو بریدونو شاهد پاتې شوی چې ځینې یې وسله والې ډلې او بېلتون پاله بریدګر ترسره کوي. تر دې پخوا په بلوچستان کې کان کیندونکي تښتول شوي او ان په دغه ډول چاودنو کې هم وژل شوي دي.
د بلوڅ بیلتون پالو په نوم وسله واله ډله اجازه نه ورکوي چې په دغه ایالت کې کان کیندنې وشي او له همدې امله ځینې وخت د کانونو کیندونکي ګارګر له وسله والو بریدونو سره هم مخ کېږي.
لا تر اوسه پورې څرګنده نه ده چې دغه چاودنه د کومې ډلې له لوري شوې او که پر کان کیندونکو خپل چاودیدونکي توکي چاودیدلي دي؛ خو ځايي پولیسو یې په اړه د پلټنو خبر ورکړی دی.
د بلوچستان په خواله رسنیو کې دغه پېښه د سړک غاړې ماین چاودنه یاده شوې ده.