د مقاومت جبهې او طالبانو ترمنځ نښته کې ۲ ملکيان ټپيان شوي او ۷ طالبانو ته مرګژوبله اوښتې
په کابل کې د طالبانو د کورنیو چارو وزارت ته څېرمه د مقاومت جبهې د جنګیالیو او طالبانو ترمنځ نښتو کې دوه ملکي کسان ټپيان شوي او اوو طالبانو ته مرګژوبله اوښتې ده.
په کابل کې د طالبانو د کورنیو چارو وزارت ته څېرمه د مقاومت جبهې د جنګیالیو او طالبانو ترمنځ نښتو کې دوه ملکي کسان ټپيان شوي او اوو طالبانو ته مرګژوبله اوښتې ده.
د مقاومت په نوم د طالبانو ضد جبهې د چهارشنبې په ورځ (د کب لومړۍ) په خپل اېکس کې لیکلي، چې په دې پېښه کې د دوی جنګیالیو ۴ طالبان ووژل او ۳ نور یې ټپيان کړي دي.
د یادې جبهې په خبره، یاد شمېر ملکي کسان د طالبانو په ځوابیه ډزو کې ټپيان شوي دي.
د مقاومت جبهه وایي، چې دغه برید یې نن ماسښین یوه بجه د کورنیو چارو وزارت ته څېرمه د کابل ښار له ۱۵مې ناحیې څخه د هوایي ډګر په عمومي سړک ترسره کړی دی.
دغه جبهه ادعا کوي، چې په دې عملیاتو کې د دوی ځواکونو ته مرګ ژوبله نه ده اوښتې.
دا په داسې حال کې ده، چې تېره ورځ د مقاومت جبهې وویل چې په تېره یوه میاشت کې د هېواد په بېلابېلو ولایتونو کې د طالبانو پروړاندې د ۲۷ عملیاتو په ترڅ کې یې د دغې ډلې نږدې اتیا غړو ته مرګ ژوبله اړولې ده.
دغې جبهې په خپل اېکس کې لیکلي، چې د دوی جنګیالیو د سلواغې میاشتې له پیل راهیسې د هېواد په لسو ولایتونو کې عملیاتونه کړي، چې په پایله کې یې ۴۲ طالبان وژل شوي او ۳۷ نور ټپيان دي.
د مقاومت جبهې ویلي دي، چې یاد شمېر عملیات په کابل، هرات، تخار، کندوز، فراه، بادغیس، پروان، کاپیسا، بغلان او بلخ ولایتونو کې شوي دي.
د یادولو ده، چې طالبانو بیا هېڅکله د دغو بریدونو په اړه غبرګون نه دی ښودلی.
