په کندهار کې د «جبري نکاح» له امله یوې ځوانې نجلۍ ځان وژلی
په کندهار ولایت کې یوې ځوانې نجلۍ وروسته له هغه ځان وژنه کړې چې کورنۍ یې د پاخه عمر څښتن کس ته په نکاح ور کړې ده. دې جینۍ د زهرجنو توکو په خوړولو سره خپل ژوند ته د پای ټکی اېښی.
په کندهار ولایت کې یوې ځوانې نجلۍ وروسته له هغه ځان وژنه کړې چې کورنۍ یې د پاخه عمر څښتن کس ته په نکاح ور کړې ده. دې جینۍ د زهرجنو توکو په خوړولو سره خپل ژوند ته د پای ټکی اېښی.
له کندهاره یوې سرچینې افغانستان انټرنشنل ته وویل، چې دا پېښه په خاکرېز ولسوالۍ کې شوې. نجلۍ له نکاح تړلو یوه اونۍ وروسته زهر خوړلي دي.
سرچینې وايي، چې کورنۍ یې دغه واده د نجلۍ له رضایت پرته ترسره کړی و.
نوموړې له زهر خوړولو وروسته د کندهار میرویس روغتون ته لېږدول شوې او هملته یې سا ورکړې ده.
د میرویس روغتون ډاکټران هم پيښه مني او وايي، چې د سعيدې په نوم دغه شل کلنه نجلۍ د زهرجنو توکو د خوړلو له کبله روغتون ته ور وړل شوې او مړه شوې ده.
په کندهار کې د طالبانو امنيه قومانداني د نجلۍ د جبري نکاح موضوع ردوي او د مرګ لامل د هغې عصبي ستونزه يادوي.
طالبانو ويلي، چې دغه نجلۍ څه موده مخکې ۲۲ کلن ځوان ته کوژده شوې او واده یې لا نه و شوی.
نجلۍ د هلمند د موسی کلا ولسوالۍ اوسېدونکې وه.
