نړۍوالې رسنۍ وايي، چې د امریکا مشرانو جرګې هندالاصله امریکايی کاش پټېل د دغې جرګې د ډېموکراټانو او جمهوريغوښتونکو غړو ترمنځ د رایېورکونې له یو جنجالي بهیر وروسته د متحدهایالاتو د فدرالي څېړنو ادارې یا اېفبيای د نوي رییس په توګه تایید کړ.
سياېناېن د پنجشنبې په ورځ (فېبرورۍ ۲۰مه) په یو راپور کې ویلي، پټېل ۵۱ مثبتو او ۴۹ مخالفو رایو له کارونې وروسته دغه موقف ته تایید شوی چې د امریکا په امنیتي او اجراییوي سیاستونو کې یو مهم بدلون بلل کېږي.
د راپور پر بنسټ، کاش پټېل د امریکا ولسمشر ډونالډ ټرمپ ته نږدې او ژمن کس یادېږي چې دمګړۍ د دغه هېواد د یوې سترې او مهمې امنیتي ادارې د مشر په توګه ټاکل شوی دی.
د نوموړي د ټاکل کېدو په دې بهیر کې د امریکا د مشرانو جرګې ډېموکراټو وکیلانو خبرداری ورکړی چې د ټرمپ له سیاسي مخالفانو سره د پټېل د مبارزې مخینې ته په کتو، ښايي نوموړی د امریکا فدرالي اداره د غچاخیستنې بنسټ په توګه وکاروي.
ورته مهال، د دغې جرګې جمهوريغوښتونکو وکیلانو د ټرمپ له ټاکنې دفاع او ادعا کړې چې کاش پټېل کولای شي څو د امریکا په فدرالي اداره کې شفافیت رامنځته کړي او د نوموړي پر وړاندې ټولې څرګندونې یې یوازې مبالغې بللې دي.
په همدې حال کې، هغه د امریکا په مشرانو جرګې کې د خپلې لومړنۍ وینا پرمهال ټینګار کړی چې نوموړی د اېفبيای ادارې ته د غچاخیستنې وسیلې په توګه د کارونې اراده نه لري او په وینا یې، دا ټول تورونه ناسم دي.
د یادونې ده چې د امریکا ولسمشر ډونالډ ټرمپ پر دغه هېواد له واکمنېدو وروسته د خپل حکومت په کابینه کې د اېلان ماسک، مارکو روبیو او پېټ هېګسټ په ګډون ډېری ټاکل شوي کسان ده ته نږدې او ژمنې څېرې بلل کېږي.
