د ملي جمهوري غورځنګ مشر او د پاکستان د پارلمان پخوانی غړی وايي، «د افغانستان په بربادۍ کې نړۍ لاس لري او دا هېواد په سیمه کې هم ملګری قوت نه لري.» محسن داوړ له افغانستان انټرنشنل سره خبرو کې وویل، «نړۍ وار په وارد باید په دې پوه کړل شي، چې طالب د افغانانو نماینده نه دی.»
محسن داوړ په هسپاینا کې د هرات ۱۲ امنیتي کنفرانس کې ګډون کړی دی.
د ښاغلي داوړ په خبره، افغانستان په ښه حالت کې نه دی او د ورته غونډو په جوړولو سره په دې تړاو باید مشورو ته دوام ورکړل شي، ترڅو افغانان له اوسني حالت د خپل هېواد د اېستلو لپاره یوې ګډې تګلارې ته سره ورسېږي.
۲۰۲۱ کې د طالبانو واکمنېدو سره نه یواځې دې ډلې ټولګډونه حکومت جوړ نه کړ، بلکې وخت ناوخت یې له ګاونډیو هېوادونو په تېره پاکستان او ایران سره سرحدي لانجې هم راځي.
پر ګاونډیو هېوادونو سربېره روسیه او نړیواله ټولنه هم افغانستان کې د وسلوالو ډلو پر شتون اندېښنه ښيي.
محسن داوړ دغو پرمختیاوو ته په پام وايي، «په سیمه کې د افغانستان ملګری قوت هم نشته او ښه ورځ افغانستان ته هیچا هم نه ده غوښتې.»
نوموړی د طالبانو لاس ته د افغانستان ورتلو کې امریکا ته هم ګوته نیسي او زیاتوي: «د افغانستان په ورانولو او بربادۍ کې د ټولې دونیا لاس دی او په دې کې د امریکا د ملګرو لاس دی او د افغانستان په ګاونډ کې چې کوم هېواد دی پاکستان غټ لاس دی.»
د هرات امنیتي کنفرانس دولسم پړاو نن دوشنبه د هسپانیا په پلازمېنه مادرید کې د «افغانستان: د هیلو د بیا راژوندي کولو ګډې هڅې» په سرلیک یل شو او ټاکل شوې، چې دوه ورځې به دوام وکړي.
د افغانستان د ستراتیژیکو مطالعاتو د انسټیټیوټ په وینا، په دغه غونډه کې سیاسي شخصیتونو، د افغان حکومت پخوانیو چارواکو او د بېلابېلو سازمانونو او هېوادونو استازو ګډون کړی دی.
دغه بنسټ په یوه خبرپاڼه کې ویلي، د غونډې په مهمو موضوعاتو کې به په نړۍوال سیاست کې د افغانستان دریځ، د ترهګرۍ ګواښ او د هېواد په راتلونکې کې د ډیپلوماسۍ رول شامل وي.
