د سيبيایس نیوز، د راپور له مخې، د هسپانیا پولیسو د دغه هېواد په سویل ختیځ الیکانت کې د انساني قاچاق کوونکو یوه ډله نیولې او له هغوی یې ۴۸ ښځې ژغورلې دي. خبر زیاتوي، چې د ژغورل شویو ښځو ډیره برخه د کولمبیا او وینزویلا اوسیدونکې دي.
په خبر کې راغلي، چې پولیسو په دغو عملیاتو کې ۴۸ ښځې، د جنسي کاروبار د درېیو اډو په ګډون له اتو په نښه شویو ځایو څخه ژغورلې دي.
پولیسو زیاته کړې، چې دغه ښځې له سوېلي امریکا څخه هسپانیا ته د دندو په درواغجنو ژمنو راوستل شوې وې.
ویل کیږي چې د دې ډلې مشري یو تن هسپانیایي سړي او دوه کولمبیايي میرمنو کوله، چې په تیر کال کې یې تر زرو زیاتې ښځې تښتولې وې.
پولیسو دا هم ویلي، چې یادې میرمنې د پاککارۍ او ښکلا په برخو کې د کار کولو په ژمنې هسپانیا ته راستول شوې وې، خو پرځای یې، «کلبونو ته وړل شوې وې، چیرې چې ترې یوازې جنسي ګټه اخیستل کېده.»
د الیکانت پولیسو ویلي، چې د «بشپړ جبري جنسي تیري» تر څنګ، دغه ښځې په دوامداره توګه د ویډیوي څار لاندې وې او اجازه نه ورکول کېده، چې په ورځ کې له دوو ساعتونو ډیر له خپلو کورونو څخه ووځي.
پولیسو دغه عملیات د یکشنبې په ورځپه الیکانت او مرسیا سیمو کې ترسره کړي. چې د درېیو کلبونو بندولو په ګډون یې ۱۷ ځایونه ضبط کړي او همداشان یې له یادې ډلې وسلې، ۱۵۰۰۰۰ یورو نغدې او په بانکي حسابونو کې ۹۳۸۰۰۰ یورو کنګل کړې دي.
د الیکانت د پولیسو په وینا، ټولټال شپږ بندیان له محاکمې مخکې په توقیف کې وو، او پاتې نور په ضمانت خوشې شوي.
د ملکیت مدیران او ټکسي چلوونکي چې ښځې به یې نورو ځایونو ته لېږدولې هم په نیول شویو کسانو کې شامل دي
