په داسې حال کې پر افغانستان د طالبانو له واکمنېدو وروسته د هېواد په بېلابېلو سیمو کې د غلاوو، لوټمارۍ او انسانتښتونې پېښو شمېر لوړې کچې ته رسېدلی، دغې ډلې د بلخ ولایت په مزارشریف ښار کې د ۴۶ کسیزې موټرسایکل سپرې قطعې د جوړېدو خبر ورکړی دی.
د طالبانانو د بلخ امنیه قومندانۍ د سېشنبې پر ورځ (د کب ۲۱مه) په یوه بیان کې زیاته کړې، چې دغه قطعه د جنايي جرمونو د مخنیوي او چټک غبرګون په موخه جوړه شوې ده.
په بیان کې ادعا شوې ده، چې په پوځي تجهیزاتو سمبال د طالبانو دغه وسلهوال ګروپ به شپه او ورځ د مزارشریف ښار د امنیتي وضعیت د ښهوالي لپاره فعالیتونه ترسره کوي.
د طالبانو د بلخ امنیه قومندان په بیان کې راغلي، چې یاده قطعه به د هر ډول پېښو په تړاو چټک غبرګون ښیي او زیاتوي، چې د امنیتي اړخونو په ډاډمنېدو کې به فعاله وي.
د طالبانو په بیان لیکل شوي دي :«د بلخ ولایت د امنيـه قومندانۍ د امنیت امر الحاج مولوي احمدضیاء خالد ډاډ ورکوي، چې دغه ګروپ د جنايي جرمونو د مخنیوي او د خلکو د امنیت د ټینګښت لپاره ژمن دی.»
طالبان داسې مهال په بلخ ولایت کې د یوې ۴۶ کسیزې پوځي قطعې د جوړېدو خبر ورکوي، چې په دې وروستو کې د دغه ولایت په ګډون د هېواد بېلابېلې سیمې د وسلهوالو غلاوو، لوټمارۍ، انسانتښتونو او جنايي پېښو شاهدانې دي.
د یادونې ده، چې وړمه ورځ د بدخشان په ارګو ولسوالۍ کې د عثمان په نوم د هغه ۷ کلن ماشوم مړی موندل شوی و، چې شاوخوا یوه نیمه میاشت مخکې تښتول شوی و.
د ځايي سرچینو په وینا، له نوموړي ماشوم څخه، سترګې، زړه، پښتورګي او ینه اېستل شوي وو.
دا په داسې حال کې ده، چې طالبانو تر دې وړاندې هم په بېلابېلو نورو ولایتونو کې د امنیت د ټينګښت په موخه د موټرسایکل سپرو قطعې جوړې کړې دي.
