د ایران د ولسمشر استازي او د نشه يي توکو ضد مرکز رییس په ویانا کې د هالنډ له سفير سره په کتنه کې ویلي، چې په افغانستان کې هیرویین او متامفتامین پټ تولیديږي. حسین ذوالفقاری وایي، چې دا یو جدي خطر دی او باید حل شي.
حسین ذوالفقاري د سې شنبې په ورځ په ویانا کې د ملګرو ملتونو د اروپا په مرکزې دفتر کې له نشه يي توکو سره د مبارزې کمیسون ۶۸مې کلنۍ غونډې په څنډه کې د هالند له سفير پيټر پوتمن سره لیدلي.
ذوالفقاري په دې لیدنه کې ویلي، تر څو چې په افغانستان کې امنیت او پرمختګ نه وي رامنځ ته شوی د نشه يي توکو او نورې ستونزي به حل نه شي.
هغه د نشه يي توکو له قاچاق وړونکو او سوداګرو سره په جګړه کې د څه د پاسه څلور زره کسانو وژل کېدو او ۱۲ زره نورو ټپي کېدو ته په اشارې وویل، چې ایران له افغانستان او پاکستان سره دوه زره کيلومتره ګډه پوله لري،چې دوی یې په یو اړخیز ډول کنټرولوي.
د ایرنا د خبر له مخې نوموړي ویلي، چې اروپا او لويديز هېوادونه ټول مسایل سیاسي ګڼي، خو له نشه يي توکو سره په مبارزه کې ایران رښتینی کار کړی دی.
له نشه يي توکو سره د ملګرو ملتونو د مبارزې اړوند کمیسیون ۶۸مه غونډه په ویانا کې جوړه شوه.
دغه کمیسیون له نشه یي توکو سره د اړوند ټولو مسالو د حل لپاره د پالیسي جوړونې مرکزي اداره ده، چې په نړۍ کې د نشه يي توکو د وضعیت ټول اړخونه څیړي، د نشه يي توکو د کنټرول نړیوال میکانیزم ته وده ورکوي او د کنټرول په برخه کې د نړیوالو بنسټونو رضایت کچه په ګوته کوي.
