په پاکستان کې د روسیې سفارت په بلوچستان کې پر مسافر وړونکې اورګاډي جعفر اېکسپریس باندې برید په کلکه غندلی او ویلي یې دي، چې هېڅ ډله باید له ملکي خلکو څخه د انساني سپر په توګه کار وانخلي.
په پاکستان کې د روسیې سفارت د چهارشنبې په ورځ پر اېکس پاڼې لیکلي: « موږ د ترهګرو دا بزدلانه ستراتیژي په کلکه ردوو چې له ملکي خلکو څخه د انساني سپر په توګه کار اخلي.»
دغه سفارت د ټولو یرغمل شویو د خوندي او چټک خلاصون غوښتنه کړې ده.
تر دې مخکې، بلوڅ ازادۍ پوځ اعلان کړی چې د پاکستان د پوځ د عملیاتو په غبرګون کې یې ۵۰ پاکستاني امنیتي سرتېري وژلي دي.
یادې ډلې ویلي، چې دا ګام یې د یرغمل شویو کسانو د تبادلې پر سر د خبرو اترو له ناکامۍ وروسته اخیستی.
د بلوڅ ازادۍ پوځ په یوه اعلامیه کې وویل، چې د پاکستاني ځواکونو د درنو وسلو برید یې دفع کړی، خو درې جنګیالي یې له لاسه ورکړي دي.
د پاکستان پوځ وايي، چې ټول جنګیالي یې وژلي او ۱۹۵ برمته کسان یې خوشي کړي دي.
د بلوڅ ازادۍ پوځ وژل شوي کسان «دوښمن ځواکونه» بللي او ادعا یې کړې ده، چې د بلوڅ ملي محکمې له خوا د جنګي جنایتونو، توکمیزې تصفیې او د بلوچستان د طبیعي زېرمو د استحصال په تورونو محکوم شوي وو.
د کب په ۲۱مه په پاکستان کې بلوڅ ازادۍ پوځ ډلې اعلان وکړ، چې د بلوچستان په دهدار بولان سیمه کې یې د جعفر ایکسپریس پر اورګاډي برید کې ۱۱پاکستاني امنیتي سرتېري وژلي او ۱۸۲ مساپر یې پرمته کړي دي.
د اورګاډي چارواکو تایید کړې وه، چې په اورګاډي کې ۴۰۰ مساپر سپاره وو.
