د پاکستان د خلکو ګوند مشر بلاول بوټو زرداري د دغه هېواد د پارلمان امنیتي کمیټې ته په وینا کې ویلي، چې افغانستان د ترهګرو لپاره په یوې خوندي ځاله بدل شوی او نړۍ باید له دغو ترهکرو ډلو د ملاتړ په اړه د طالبانو له رول څخه باخبره وي.
هغه په نړېوالو سازمانونو او حکومتونو غږ کړی، چې له ترهګرۍ څخه راپورته شوی کواښ جدي وګڼي او که نه نو دغه ګواښ به ګاونډیو هېوادونو ته هم خپور شي.
په دغې غونډه کې، چې د پاکستان د پارلمان د مشر ایاز صادق په مشرۍ جوړه شوې وه، بلاول بوټو ټینګار کړی، چې د ترهګرۍ هغه اور چې پاکستان په کې سوځي، ډېر ژر به ګاونډیو هېوادونو ته هم خپور شي.
هغه د سیمې له هېوادونو وغوښتل، چې د دغه کړکېچ پر وړاندې غښتلي ډیپلوماټیک اقدامات ترسره کړي.
په هغو استخباراتي راپورونو کې، چې په یاده غونډه کې وړاندې شوي، په پاکستان کې د ترهګرو ډلو په ملاتړ کې د هند استخباراتي ادارو او له افغانستان څخه د ځینو طالب عناصرو د رول یادونه هم شوې ده.
د دغه راپور له مخې د پښتونخوا او بلوچستان په ګډون د پاکستان په بیلابیلو سیمو کې وروستي ترهګریز بریدونه له افغانستان څخه همغږي شوي وو.
بلاول بوټو زرداري له امنیتي ګواښونو سره د مقابلې لپاره د پاکستان د بهرنۍ تګلارې پر پیاوړتیا ټینګار کړی او ویلي دي: «پاکستان باید له لازیاتو نړیوالو همکاریو څخه ګټه پورته کړي، ترڅو وکولای شي له ترهګرۍ له ګواښونو سره په اغیزمنه توګه مبارزه وکړي.»
بلاول بوټو او نورو پاکستاني چارواکو یو ځل بیا پر طالبانو غږ وکړ، چې د هغو ترهګریزو ګواښونو مسوولیت په غاړه واخلي، چې د سیمې امنیت یې له ګواښ سره مخامخ کړی دی.
که څه هم طالبانو په رسمي ډول تر اوسه پورې د بلاول بوټو دغو څرګندونو ته غبرګون نه دی ښودلی، خو طالبان تل د پاکستاني سیاسیونو او چارواکو دا ډول څرګندونې بیځایه تورونه ګڼي او په پاکستان کې نا امني د دغه هیواد کورنۍ موضوع یادوي.
