سره له دې چې سيمهييز هېوادونه او د ملګرو ملتونو امنيت شورا د افغانستان دننه د ترهګريزو ډلو د زياتېدونکو فعاليتونو په اړه اندېښنه لري؛ خو د ايران د بهرنيو چارو وزير عباس عراقچي ويلي، چې «اوسمهال په افغانستان کې تر یو چتر لاندې حاکميت او امنيت ټینګ شوی دی».
عراقچي ويلي: «پخوا به د افغانستان هر ګوټ د بل چا په لاس کې و؛ خو اوس داسې نه ده». هغه زياته کړې، اوس په افغانستان کې يوه ځواکمنه اداره حاکمه ده چې په تېرو درې نيمو کلونو کې يې خپل واک ثابت ساتلی دی.
د ترهګرۍ دوامداره اندېښنه
سره له دې چې عراقچي د امنيت ټينګښت ته اشاره کړې؛ خو هغه دا یې هم منلې چې په افغانستان کې د داعش او نورو ترهګريزو ډلو فعاليتونه جدي او مهم دي.
د ايران د بهرنيو چارو وزير داسې مهال په افغانستان کې دامنیت د ټینګښت ادعا کړې، چې د ملګرو ملتونو امنيت شورا، سيمهييز هېوادونه او حتی خپله ايران څو ځله د افغانستان د ترهګريزو ډلو د زياتېدونکو فعاليتونو په اړه اندېښنه ښودلې ده.
د ملګرو ملتونو د امنيت شورا د راپورونو له مخې، طالبانو القاعده ډلې ته اجازه ورکړې چې په افغانستان کې خپلې اډې جوړې کړي او د دې ډلې خوندي پټنځایونه او روزنيز کمپونه د افغانستان په بېلابېلو سيمو کې شته.
همدارنګه داعش خراسان نوې لارې موندلي؛ څو خپل کسان جذب کړي او لېږد یې هم تنظیم کړي.
که څه هم طالبان ادعا کوي، چې د داعش ډله یې سخته ځپلې او پر ضد یې جدي اقدامات کړي؛ خو د داعش خراسان څانګې په تېرو درېیو کلونو کې خپل خونړي بريدونه دوامداره ساتلي دي. دغه ترهګرۍ ډلې ان د طالبانو پر لوړپوړو چارواکو هم بريدونه کړي دي.
کابل ته د سفر توجيه
عراقچي د خبر انلاین خبري اژانس سره په خبرو کې ويلي، د ايران او طالبانو ترمنځ ځينې جدي موضوعات مطرح دي چې بايد حل شي.
هغه وويل، چې د ترهګرۍ مسله، د شيعه مذهبو امنيت، د ايران لپاره د فارسي ژبې سره حساسيت او د هلمند د اوبو حقابه هغه مسايل دي چې د ايران له ملي ګټو سره تړاو لري. عراقچي وويل: «هر يو له دې مسايلو جدي ستونزې دي او موږ بايد د خپلو ملي ګټو لپاره دا مسايل حل کړو».
د ايران د بهرنيو چارو وزير د سلواغې په مياشت کې د يو پلاوي په مشرۍ کابل ته سفر وکړ.
د طالبانو تر واک لاندې افغانستان ته د عراقچي سفر د ځينو ايراني رسنيو له نیوکو سره هم مخ شوی.
عراقچي په خپله تازه مرکه کې د کابل سفر توجيه کړ او ټينګار يې وکړ، چې ايران د طالبانو حکومت په رسميت نه پېژني؛ خو زياته يې کړه:« له ايران پرته د نورو هېوادونو د بهرنيو چارو وزيران هم کابل ته تللي دي، لکه د چين او قطر د بهرنيو چارو وزيران او د قطر لومړی وزير. همدارنګه، د مرکزي اسيا ځينو سياستوالو هم سفرونه کړي دي».
