د افغانستان پخواني ولسمشر محمد اشرف غني د کمکي اختر د مبارکۍ په پيغام کې نړیوال نظم کې پراخو بدلونونو او د افغانستان پر وړاندې ننګونو ته په اشاره وايي، حکومتوالي له پلان او مسوولیت پرته ناشونې ده.
حمد اشرف غني په اختريز پيغام کې ټولو افغانانو ته مبارکي ویلې او هغوی ته يې د ښه ژوند هيله ښودلې.
نوموړي د یوسف علیه السلام کیسې ته په اشاره زیاتوي: «حضرت یوسف ع په خپل علم او تدبیر سره وکولای شول چې قحطي اداره کړي او خلک له لوږې وژغوري.»
اشرف غني که څه هم په افغانستان کې لوږې ته اشاره نه کوي، خو د طالبانو واکمنېدو سره ورځ تر بلې د افغانانو اقتصادي حالت خرابېږي او لوږه ډېرېږي.
ور سره طالبان نه یواځې په حکومتوالۍ کې پاتې بلل کېږي بلکې دا نیوکې هم پرې کېږي چې مسلکي خلک له دندو لرې کوي.
ولسمشر غني د طالبانو خپلمنځي اختلاف ته له اشارې پرته په خپل پیغام کې زیاتوی، «هر هغه څوک چې د رهبرۍ پر سر شخړه لري باید خلکو ته ځواب ووايي.»
د طالبانو حکومت په اړه اوس تر بل هر وخت د اختلاف خبرې ډېرې کېږي.
د دې ډلې د بهرنیو چارو وزارت مرستیال له نږدې دوو میاشتو راهیسې په دوبۍ کې دی او د کورنیو چارو وزیر یې سراج الدین حقاني هم دفتر ته لا نه دی تللی.
سرچیني وايي، چې د کندهار ښار په ګڼه ګوڼه ځایونو کې طالبان له ځانګړي یونیفورم پرته د عامو کسانو په څیر په مخفي ډول څارنه کوي.
طالبانو د شبنې په ورځ ناوخته د هغو ۹ جوماتونو نومونه او ادرسونه اعلان کړل چې سبا به د اختر لمونځ پکې وشي.
ځايي سرچیني وايي، چې طالبانو له اعلان وړاندې هم د ښار د بېلابېلو برخو تر څنګ د هغو جوماتونو په شاوخوا کې کلک امنیتي تدابیر نیولي و، چې ښايي د اختر لمونځ په کې ترسره شي.
ځايي سرچیني وايي، د لوی عیدګاه پر شاوخوا ډیر طالبان ځای پر ځای شوي دي او د جومات شاوخوا کې نقلیه وسایلو پر ګرځیدو باندي بندیز لګول شوی.
دغه سرچیني وايي، چې د لوی عیدګاه جومات ته نږدې ځینې سړکونه د عامو خلکو د تګ راتګ پرمخ هم بند شوي دي.
د طالبانو مشر ملا هبت الله اخندزاده په نورو اخترونو کې د اختر لمونځ لپاره د کندهار ښار لوي عیدګاه جومات ته تلی او خلکو ته یې وینا هم کولې.
