کابل کې د چاودنې غږ اورېدل شوی

په کراچۍ کې د طالبانو کونسلګرۍ نن سې شنبه «د وري ۱۲مه» پر خپله اېکسپاڼه لیکلي چې په دغه ښار کې د طالبانو کونسل عبدالجبار تخاري د سند والي محمد کامران خان تیسوري او سر وزیر سید مراد علي شاه سره لیدلي دي.

عبدالجبار تخاري په دې لیدونو کې د اپرېل له لسمې وروسته د افغان کډوالو د اېستلو په تړاو اندېښنې شریکې کړې.

هغه ویلي چې په سند ایالت کې دې پولیس د قانوني اسناد لرونکو افغانانو له ځورولو ډډه وکړي.

په کراچۍ کې د طالبانو تر واک لاندې کونسلګرۍ د پاکستان د سند ایالت سر وزیر مراد علي شاه په حواله لیکلي، چې نوموړي په دې برخه کې د همکارۍ ژمنه کړې ده.

په پاکستان کې له تېرو څو میاشتو راپه دې خوا افغانانو د پولیسو تر څار او تعقیب لاندې دي.

د اسلام اباد او راولپنډۍ پولیس کور په کور د افغانانو لټه کوي او تر اوسه زرګونه هغه افغانان نیول شوي چې قانوني اسناد یې نه لرل.

له دې ډلې زیات شمېر په جبري ډول له پاکستان څخه اېستل شوي او زیات شمېر لا هم د (حاجي کمپ) په نوم د پولیسو په یوه مرکز او د ستنولو په نورو کمپونو کې د شړلو په درشل کې دي.

د ایران ايرنا خبري اژانس د سې شنبې په ورځ په هرات کې د طالبانو د ښاروالۍ له قوله لیکلي، چې دغې ډلې له ایراني چارواکو څخه د ټراکټور د توليد جوړولو غوښتنه کړې.

په خبر کې راغلي، چې د هرات د طالبانو د ښاروالۍ مرستيال جلال الدین حقدوست د هرات په مرکزي چوک کې د ټراکټور د سمبول د نومولو او پرانيستې په مراسمو کې وویل: «د ټراکټور سمبول نصبول د دوو ګاونډيو دوستو هېوادونو ترمنځ د یووالي او همغږۍ نښه ده.»

حقدوست ټينګار کړی، چې دوی د دغه ډول اقداماتو هرکلی کوي او په دغه هېواد کې د ټراکټورونو د توليد جوړېدل به د افغانانو د خوښۍ لامل شي.

په مراسمو کې په هرات کې د ایران کونسلګرۍ مرستیال سید علي کامیاب د ایراني تولید ټراکټور په نوم د مرکزي څلور لارې نومول د ایراني صنعت د پياوړتيا په نوم یاد کړ او دا یې د د واړو هېوادونو د اړیکو لپاره یو نوی پړاو بللی دی.

هغه زياته کړې: «دغه اقدام به د دواړو هېوادونو په خاص ډول اقتصادي اړیکو کې یو نوی پيل وي.»

د ایرنا د معلوماتو له مخي، د دغه هېواد د ټراکټونو صنعتي ګروپ په تبريز کې ۹، په سنندج، ارومیه کې او په بهر کې د دوو - دوو څانګو په لرلو سره له تېرو ۵ لسیزو څخه فعالیت لري او تر دامهاله يې د زراعت او صنعت په برخه کې ۷۱ ډوله ماشينونه توليد کړي دي.

په سویلي ولایتونو کې په اخترونو، ځانګړو ورځو او رخصتيو کې ډېری ځوانان په بې پروایۍ په تېز سرعت موټرسایکلونه ځغلوي، چې اوس طالبان د سزا ورکولو ترڅنګ د هغوی سرونه هم خرېیي.

طالبانو په رسمي ډول په دې اړه خبرداری نه دی ورکړی، خو پر ټولنیزو شبکو خپرې شوې یوې ویډیو کې ښکاري، چې یو طالب د یوه ځوان سر کلوي او وایي: « دغه ځوان په موټرسایکل د مخ ټېرونه پورته کول او ځغلوی یې اوس مو سخت قانون ورته ايښی.»

په افغانستان کې تنګ سړکونه، د ترافيکي اصولو، ترافيکي نښو او سخت څار نشتوالی د ډېرو ترافيکو پېښو لامل ګرځي.

ډېر وخت پر طالب مسوولينو او امنیتي کسانو هم نیوکې کيږي، چې د موټر چلولو پر مهال ترافيکي اصول په پام کې نه نیسي او زيات په زور او پر یو طرفه سړکونو او تيز سرعت موټر چلوي.

همدا تېره ورځ د کندهار – هرات پر لویه لار په یوه ترافيکي پېښه کې د کندهار د یوه خصوصي پوهنتون درې استادان مړه شول.

بل خوا بیا د اختر د خوښۍ په مراسمو کې د طالبانو د امربالمعروف محتسبين په تفریح ځایونو کې د ځوانانو د لوبو مخه نيسي او پر هغوی خپل نوي قوانين عملي کوي.

افغانستان انټرنشنل ـ پښتو ته له کندهار ه یو شمېر ځوانانو په پيغامونو کې ویلی، چې دې ډلې د دوی د تفريح پر مهال د لوبو توکي او «لډو» ټول کړي او خبرداری یې ورکړی، چې د دوی بنديزونه عملي کړي.

د طالبانو امربالمعروف څو میاشتې وړاندې په کندهار کې پر لډو او قطعو بندیز ولګاوه او دا یې یو عبث کار وباله.

سیمه ییزې سرچینې وايي، چې د پاکستان له خوا په انګور اډه کې محلي مسوول افسر طالبانو ته میټايي ( خواږه) ورکړل او دواړو خواوو د دوه اړخیزو اړیکو د ښه والی هیله وښوده.

دغه راز دداوړو خواوو پوله ساتو په غلام خان ترمینل کې هم میټايي سره تبادله کړي.

د افغانستان او پاکستان ترمنځ په دې وروستیو کې د ډیورنډ کرښې په اوږدو کې د جنګیالیو پر حضور او پوځي پوستې جوړولو شخړې شوې دي، چې دواړو خواوو ته پکې مرګ ژوبله هم اوښتې ده.

پاکستان پر طالبانو تور لګوي، چې د پاکستاني طالبانو د غورځنګ کوربه توب او ملاتړ کوي، خو طالبان دا تورونه ردوي او د پاکستان پوځ دداعش په ملاتړ تورنوي.

دغه خواږه داسې مهال سره وېشل کیږي چې انګور اډه، خرلاچي لارې اکثره وخت د سوداګرۍ پرمخ تړلې وي.

د طالبانو د کار او ټولنیزو چارو وزارت نن سې شنبه «د وري ۱۲مه» یوه خبرتیا خپره کړې ده.

په دې خبرتیا کې ویل شوي چې د طالبانو د کار او ټولنیزو چارو وزارت اړوند د کار تفتيش او لارښوونې رياست په پام کې لري، چې د کوچني اختر له رخصتيو وروسته په ادارو کې د نظم، انضباط او د کارکوونکو د شته والي د تثبیت په خاطر حاضرۍ کنترول شي.

دوی ټینکار کړی چې د طالبانو تر واک لاندې ادارې مکلفې دي چې له مفتشانو سره پوره همکاري وکړي او همدارنګه د خپلو حاضريو صورت له هغوی سره شريک کړي.

د طالبانو د کار او ټولنیزو چارو وزارت له خوا په داسې حال کې دا خبرتیا خپریږي، چې په افغانستان کې د ډیرو دولتي ادارو کارکوونکي د رخصتیو په پای کې په ورځو ورځو ادارو ته نه حاضریږي.

د طالبانو سترې محکمې د یکشنبې ورځ، د وري ۹مه، په افغانستان کې د کوچني اختر لومړۍ ورځ اعلان کړه.

د طالبانو د کار او ټولنیزو چارو وزارت د اختر درې ورځې عمومي رخصتي اعلان کړې وه، چې سبا پای ته رسېږي.