د روسیې پینزا ایالت افغانستان ته د توکو صادرات پیلوي
د مسکو له تور نوملړه د طالبانو له نوم اېستنې وروسته، روسي سوداګر غواړي افغانستان ته صادرات پیل کړي او د افغانستان په وارداتو متکي مارکیټ کې خپله ونډه زیاته کړي.
د سې شنبې په ورځ، د مرغومي پر نهمه، د روسیې د پینزا ولایت والي د ازبکستان په پلازمینه تاشکند کې د « اننوپرام- منځنۍ اسیا» په نامه نندارتون کې د ګډون پر مهال اعلان وکړ، چې ولایت یې غواړي د خپلو صادراتو جغرافیه افغانستان ته وغځوي.
اولیګ مېلنیچینکو پر خپلو ټولنیزو شبکو ولیکل، چې « موږ اراده لرو چې د ترمذ نړیوال سوداګریز مرکز له لارې خپل توکي افغانستان ته صادر کړو».
نوموړي وویل، چې دغه مرکز د افغانستان او ازبکستان پر پوله د ازادې سوداګرۍ په سیمه کې فعالیت کوي.
افغانستان ته د خپلو صادراتي پلانونو په اړه مېلنیچینکو د ازادې سوداګرۍ د «ایریتوم» سیمې له مرستیال مدیرسنجر صادقوف سره هم خبرې کړې دي.
د روسیې د پینزا والي څرګنده کړه، « موږ وړاندیز کوو چې فرنیچر، غیرالکولي مشروبات او د ترکي غوښې محصولات افغانستان ته صادر کړو. زموږ توکو ته هلته لېوالتیا شته، نو ژر تر ژره به یو ځانګړی پلاوی ترمذ ته واستوو، چې د دغه مرکز له شرایطو سره له نږدې اشنا شي».
پینزا ولایت د روسیې د ۱۷ نورو سیمو تر څنګد تاشکند په صنعتي نندارتون کې خپل توکي او محصولات نندارې ته وړاندې کړل، چې د یاد ولایت ۵ شرکتونو هم پکې ګډون درلود.
مېلنیچینکو پر خپل ټیلیګرام کانال څرګنده کړې چې د دې لیدنې هدف دا دی چې افغانستان ته د پینزا ولایت د محصولاتو د صادراتو احتمالي فرصتونه وڅېړل شي.
