د هند او پاکستان لوړ پوړو پوځي چارواکو د تاوتریخوالي مخنيوي پر سر خبرې کړي
رویټرز خبري اژانس راپور ورکړی، چې د پاکستان او هند لوړو پوړو پوځي چارواکو ترمنځ د کړکېچ د کمولو پر سر خبرې شوي دي. دا خبرې د اسلام اباد او نوي ډیلي ترمنځ له څو ورځني روان کړکېچ وروسته ترسره شوې دي.
د رویټرز د راپور له مخې، د دغو خبرو پر مهال هند د پاکستان پر پوځیانو نیوکه کړې، چې پرته له کوم دلیله یې د «کشمیر پر پوله پرې ډزې» کړي دي.
راپور کې راغلي چې د کشمیر په پوله د دواړو ځواکونو ترمنځ په تېرو څو ورځو کې پر یو بل ډزې شوي او ترینګلی وضعیت لا هم دوام لري.
تېره اوونۍ په هندي کشمیر کې وسله والو ۲۵هندي سېلانیان ووژل او ۲۰نور یې ټپیان کړل.
تر دې پېښې وروسته نوي ډیلي ګوته اسلام اباد ته ونیوله او دواړو لوریو د یو بل پر ضد توند اقدامات هم وکړل. هم مهاله په پاکستان کې وېره شته چې ګوندې هند به د کشمیر د پېښې په غبرګون کې پر پاکستان پوځي برید وکړي.
