د پاکستان د پارلمان غړي شېرافضل خان مروت په یوې تازه مرکه کې ویلي، چې د پښتونخوا پښتانه نور د پاکستان لپاره د هندوستان خلاف نه جنګېږي او دا ځل باید د پنجاب په ګډون د سند ایالت اوسېدونکي دا دنده ترسره کړي.
هغه د یوه پنجابي خبریال د هغه پوښتنې په ځواب کې چې ولې پښتانه د پاکستان پوځ سره د جګړې په لیکو کې نه ودرېږي زیاته کړې، چې په پاکستان کې پښتانه بې کوره شوي او لادرکه شوي دي. د هغه په خبره، پښتانه اوس مهال خپله د نا امنیو ښکار دي او نور نه شي کولای چې په جګړو کې برخه واخلي.
د شېر افضل خان مروت په وینا، د پاکستان حکومت دې د پښتنو وسایل، حقونه او لادرکه شوي کسانو تر څنګ امنیتي ستونزې حل کړي، نو بیا به یې ملاتړ وکړي.
د نوموړي په خبره، پاکستان د افغانستان او ایران په ګډون له هېڅ ګاونډي سره ښه چلند نه لري.
د پاکستان د پارلمان دا غړی باور لري چې د هندوستاون او پاکستان د پوځي ځواک تر منځ ځمکه او اسمان توپیر دی. هغه هندوستان په پوځي لحاظ پر پاکستان غښتلی بللی دی.
