خواجه اصف: د پهلګام د پېښې په تړاو دې ملګري ملتونه بې پرې څېړنې وکړي
پاکستاني چارواکو ویلي چې د هندي کشمیر په پهلګام کې د ترهګریزې پېښې د څېړلو له پاره دې د ملګرو ملتونو یو کمېسیون جوړ شي او بې پرې څېړنې دې ترسره کړي.
پاکستاني چارواکو ویلي چې د هندي کشمیر په پهلګام کې د ترهګریزې پېښې د څېړلو له پاره دې د ملګرو ملتونو یو کمېسیون جوړ شي او بې پرې څېړنې دې ترسره کړي.
د پاکستان دفاع وزیر خواجه محمد اصف د پاکستانۍ رسنۍ جیو نیوز په یو پروګرام کې وویل: «یا خو دې دوه درې هېوادونه په ګډه څېړنې وکړي، یا دې بیا د ملګرو ملتونو له لوري یو کمېسیون جوړ شي.»
خواجه آصف زیاته کړې چې د هند د تحقیقاتو وړاندیز ځکه نه مني، چې ویره لري کوم بل څه راښکاره نشي.
نوموړي همدا زار وویل، د خبرو اترو امکان هېڅکله هم له احتماله نه شي ایستل کېدای، ځکه که هر څومره تاوتریخوالی هم وي، بیا هم د خبرو اتور لار غوره کېږي.
د پاکستان دفاع وزیر دا هم وویل چې د پاکستان او هندوستان ترمنځ د جګړې احتمال کم شوی، خو په هند کې اوسمهال یوه ویره موجوده ده. د نوموړي په وینا، ټول هېوادونه وایي چې دا موضوع باید د خبرو له لارې حل شي.
خواجه اصف زیاته کړه، امریکا، روسیه، چین، ترکیه، ایران یا بل هر هېواد د دې تحقیقاتو پیل کولای شي.
نوموړي وویل: «په پېلګام کې له یوې خوا پېښه وشوه او په لسو دقیقو کې قضیه ثبت شوه، دا خپله د پېلګام د پېښې پر اعتبار د شک سبب شوې، ان د هند دننه هم د دې پېښې پر سموالي نیوکې شوې دي».
څه وخت وړاندې په هندي کشمیر پهلګام کې وسله والو پر سیلانیانو ډزې وکړې او ۲۶ سیالانیان یې ووژل، په دغه پېښه کې دولس کسان نور ټپیان شوي هم دي، له پېښې وروسته د هند حکومت پاکستان په دغه پېښه کې په لاس لرلو تورن کړی او د غچ اخیستو ګواښ یې کړی، د څو ورځو په تېریدو د دواړو هېوادنو ترمنځ په پوله وړې نښې هم ترسره شوي او حالات لا هم ترینګلي دي.
