د طالبانو د چارو ادارې مشر نورالحق انور وایي، طالبان د بېوزلو خلکو د اړتیاوو پوره کولو مسوولیت لري. هغه زیاته کړې، چې دې هدف ته د رسېدو لپاره باید پانګوالو ته لازمې اسانتیاوې برابرې شي، ترڅو د بېوزلو اړتیاوې د اغېزمنې پانګونې له لارې پوره شي.
د طالبانو د چارو ادارې د شنبې په ورځ (د غويي ۱۳مه) پر اېکس پاڼه کاږلي، چې د یادې ادارې په تالار کې د چارو ادارې رییس نورالحق انور د غونډې د پیل په وینا کې د پانګوالو لپاره د اسانتیاوو رامنځته کولو پر اهمیت خبرې وکړې.
نورالحق انور وویل: «ملا هبتالله په دې برخه کې واضح لارښوونې کړي، او ځینو اړوندو څانګو ته یې دنده سپارلې چې په دې برخه کې بنسټیز ګامونه پورته کړي.»
په غونډه کې پرېکړه وشوه، چې د پانګونې د اسانتیاوو د رییس په مشرۍ، او د مالیې، ملي اقتصاد او زیربناوو د اړوندو څانګو د متخصصینو په ګډون، یوه تخنیکي کمېټه جوړه شي. دغه کمېټه به د چارو ادارې د عمومي ریاست د اداري پروسو د ساده کولو لپاره د پانګونې د اسانتیاوو په برخه کې مشخصې حللارې وړاندې کړي.
همداراز، په دغه غونډه کې د طالبانو د چارو ادارې اړوند وسایطو، د عوایدو د راټولولو او د تاریخي سیمو د ترمیم، ساتنې او پالنې د چارو د ریاست تر مدیریت لاندې د ساتنې څرنګوالي په اړه هم لازم تصمیمونه ونیول شول.
دا په داسې حال کې ده، چې له دې وړاندې د طالبانو مشر ملاهبت الله په کندهار کې د کوچني اختر د لمانځه په مراسمو کې ویلي و، چې فقر د الهي تقدیر یوه برخه ده او غریبان باید د خپل وضعیت په اړه شکایت ونه کړي.
د ملګرو ملتونو د وروستیو راپورونو پر بنست په افغانستان کې د طالبانو د واکمنۍ پر مهال د بې وزلو شمېر دوه چنده شوی او ۳۴ میلیون ته رسېدلی دی.
