د سویس د کډوالو ادارې یوې طرحې ته د غبرګونونو په دوام، د افغانستان د جمهوري نظام مخکېنی لوی څارنوال فرید حمیدي وايي، چې د پښتنو په ګډون د ټولو قومونو ښځې او نجونې له خپلو ټولو حقونو محرومې شوې دي.
حمیدي د دوشنبې په ورځ د خپلې اېکسپاڼې له لارې په یوه بیان کې زیاته کړې، دا ادعا چې پښتانه د طالبانو له ظلمونو څخه خوندي دي، یو «غېرواقعي قضاوت» دی.
د هغه په وینا، دا ډول طرحې د افغانستان د پېچلتیاوو او اوسني ناورین په هکله د دغه ناخبرتیا څرګندوي.
نوموړي لیکلي دي: «دا سمه ده چې ډېری طالبان او د هغوی لوړپوړي چارواکي پښتانه او اغلب د یوه ولایت دي، خو طالبان د افغانستان د ټولو قومونو او خلکو دوښمنان دي.»
حمیدي ټینګار کړی، چې طالبانو ټول قومونه، په ځانګړې توګه پښتانه ډېر کړولي دي او د دغې ډلې اقداماتو په افغانستان کې قومي ستونزو ته لمن وهلې ده.
فرید حمیدي زیاته کړې: «د پښتنو په ګډون د ټولو قومونو ښځې او نجونې، له خپلو ټولو حقونو څخه محرومې شوې دي. د ټولو قومونو مسلکي کادرونه له دولتي ادارو او دندو فرصتونو څخه اېستل شوي او د ناقانونه ځورونې، شکنجې او وژنې څخه د وېرې له امله له هېواده وتلو ته اړ شوي دي.»
د یادونې ده، چې د پښتنو په اړه د سویس د کډوالو ادارې یوې طرحې په نړۍواله کچه غبرګونونه راپارولي دي. همدا نن د متحدې ملي جبهې مشر جنرال سمېع سادات هم ویلي چې پښتانه له ترهګرۍ سره د مبارزې په لومړۍ کرښه کې دي.
هغه د سویس له حکومت څخه غوښتنه کړې، چې باید دا قومپرسته طرحه پر خپل ځای ودروي.
