د روسیې چارواکي وايي، دا دویمه پرلهپسې شپه ده چې د اوکراین بې پېلوټه الوتکې پر مسکو د بریدونو هڅه کوي، خو د روسیې هوایي دفاعي ځواکونو لږ تر لږه ۱۹ ډرونونه ویجاړ کړي دي.
د دې پېښې له امله د مسکو څلور واړه هوایي ډګرونه د لنډمهال لپاره تړل شوي دي.
د مسکو ښاروال سرګي سوبیانین ویلي چې پېښه کې جدي زیان نه دی اوښتی، خو د یوې ډرون الوتکې ټوټې د پلازمېنې په سویل کې د یوې ودانۍ ښیښې ماتې کړي دي. نوموړي زیاته کړې، بیړني خدماتي ټیمونه د پېښو په ځایونو کې حاضر دي.
د روسیې او اوکراین ترمنځ جګړه درې کاله وړاندې هغه مهال پیل شوه چې روسیې پر اوکراین یرغل وکړ. له هغه راهیسې، اوکراین څو ځله پر مسکو د ډرون بریدونه ترسره کړي، چې تر ټولو خونړی یې د مارچ په میاشت کې و.
کییف وايي، دا بریدونه د روسیې یرغلونو ته غبرګون او د مهمو تاسیساتو د ویجاړولو هڅه ده.
