مېرڅ د جرمني د صدراعظمۍ لپاره له پارلمان نه اکثریت رایې ترلاسه نه کړای شوې
د جرمني په تاریخ کې لومړی ځل دی چې د بوندسټاګ یا پارلمان په لومړي دور کې کوم ټاکل شوی صدراعظم د اړین اکثریت ترلاسه کولو کې ناکامیږي.بوندسټاګ باید په ۱۴ ورځو کې دویم انتخاباتي دور ترسره کړي.
د سې شنبې په ورځ، د سوسیال مسیحي دیموکرات اتحاد مشر فریدریښ میرڅ په سري رایه اچونه کې یوازې ۳۱۰ رایې ترلاسه کړې، چې له ضروري اکثریت ۳۱۶ رایو څخه شپږ رایې کمې دي.
د سوسیال مسیحي دیموکراتانو اتحادیه او سوسیال دیموکرات ګوند په پارلمان کې ټولې۳۲۸ څوکۍ لري، خو میرڅ بیا هم اړین اکثریت نه دی ترلاسه کړی.
د بوندسټاګ رییسې جېولیا کلوکنر اعلان وکړ: « فریدریښ میرڅ ۳۱۶ د رایو اکثریت نه دی ترلاسه کړی. هغه د جرمني د فدرالي جمهوریت د صدراعظم په توګه ونه ټاکل شو».
اوس د جرمني ایتلافي ګوندونه د راتلونکو ګامونو په اړه مشوره کوي. فریدریښ میرڅ او د ایس پي ډي شریک رییس لارز کلینګبایل د دوشنبې په ورځ پر دې ټینګار کړی و چې دوی به په لومړي دور کې د حکومت جوړوونکو ایتلافونو له خوا په قاطع اکثریت سره میرڅ د صدراعظم په توګه وټاکي، خو اوس د دې پریکړې لپاره مشورې روانې دي.
د جرمني د اساسي قانون له مخې، که ټاکل شوی شخص په لومړي دور کې ونه ټاکل شي، نو بوندسټاګ یا پارلمان باید په ۱۴ ورځو کې دویم انتخاباتي دور ترسره کړي. که په دویم دور کې هم ټاکل شوی صدراعظم ونه ټاکل شي، نو په درېیم انتخاباتي دور کې یوازې د حاضرو غړو د رایو اکثریت ته اړتیا ده.