د هند کورنیو چارو وزارت له یو شمېر ایالتونو غوښتي چې د ملکي دفاع لپاره تمرین ترسره کړي
د هند کورنیو چارو وزارت یو شمېر ایالتونو ته امر کړی، چې د ملکي دفاع او وګړو د خوندیتوب لپاره تمرینونه او لازم اقدامات ترسره کړي.
د هند کورنیو چارو وزارت یو شمېر ایالتونو ته امر کړی، چې د ملکي دفاع او وګړو د خوندیتوب لپاره تمرینونه او لازم اقدامات ترسره کړي.
د هندي رسنۍ بهارت ایکسپریس د راپور له مخې، د دې تمرین پر مهال به د هوایي برید خبرداریو لپاره سایرنونه غږول کېږي، او خلکو ته به دا ښودل کېږي چې د برید په صورت کې څنګه ځانونه خوندي کړي.
په دغه تمرین کې به زدهکونکي، کلیوالي او ښاري وګړي هم شامل وي، چې د ملکي دفاع اړوند روزنه وګوري، ترڅو د بېړني حالت پر مهال د خوندي پاتې کېدو لارې چارې زده کړي.
دا اقدامات له هغه وروسته ترسره کېږي چې په پهلګام کې له ترهګریز برید وروسته د هند او پاکستان ترمنځ کړکېچ خورا ترینګلی شوی دی.
د هند اېنډین اېکسپرېس رسنۍ راپور ورکړی، چې د ملګرو ملتونو امنیت شورا د دوشنبې په ماسپښین د تړلو دروازو تر شا د هند او پاکستان ترمنځ د روان کړکېچ په تړاو غونډه وکړه. دغه کړکېچ د جمو او کشمیر په پهلګام سیمه کې د ترهګریز برید وروسته پیل شو، چې له امله یې ۲۶سېلانیان ووژل شول.
د راپور له مخې، په غونډه کې ټولو ګډونوالو د دواړو هېوادونو ترمنځ د تاوتریخوالي کمولو غوښتنه وکړه او د پاکستان لپاره یې سختې پوښتنې راپورته کړې.
دغه غونډه تېره ورځ د پاکستان په غوښتنه د ملګرو ملتونو د امنیت شورا د مشر لهخوا تنظیم شوې وه.
په دغه غونډه کې د ملګرو ملتونو د امنیت شورا ۱۵ غړو ګډون لاره.
د سیاسي او سولې په چارو کې د منځني ختیځ، اسیا او ارام سمندر لپاره د تونس مرستیال سرمنشي خالد محمد خیري له غونډې څخه د وتلو پر مهال وویل، چې په غونډه کې د خبرو اترو او د شخړې سولهییز حل غوښتنه شوې ده.
هغه زیاته کړه، چې اوسمهال وضعیت بې ثباته دی.
له بل پلوه بیا په ملګرو ملتونو کې د یونان دایمي استازي او د ملګرو ملتونو د امنیت شورا اوسني مشر ایوانجیلوس سېکرېس دغه غونډه ګټوره یاده کړه.
په راپور کې ادعا شوې، چې د وضعیت نړۍوال کولو لپاره د پاکستان هڅه ناکامه شوه او د دغه شورا غړو اندېښنه څرګنده کړه چې د پاکستان د توغندیو ازموینې او اټومي بیانونه د تاوتریخوالي د زیاتوالي لامل کېږي.
په ملګرو ملتونو کې د پاکستان دایمي استازي عاصم افتخار احمد خبریالانو سره د خبرو پرمهال د شورا څخه د تاوتریخوالي د کمولو او خبرو اترو وړاندیز له امله مننه وکړه او زیاته یې کړه:« که څه هم پاکستان د شخړې هڅه نه کوي؛ خو موږ په بشپړ ډول چمتو یو، چې د خپل حاکمیت او ځمکنۍ بشپړتیا دفاع وکړو.»
د پهلګام برید وروسته
د جمو او کشمیر په پهلګام کې له برید وروسته د هند او پاکستان ترمنځ اړیکې خورا ترینګلې شوې دي.
دغه پېښه کې بریدګرو د سېلانیانو په یوه ډله ډزې وکړې، چې له امله یې ۲۶ کسان ووژل شول.
د دغې پېښې پړه د لشکر طیبې ډلې په غاړه واخیسته.
له برید وروسته، د هند حکومت د پاکستان په وړاندې د اوبو تړون ځنډولو او له دغه هېواده د پاکستاني وګړو د اېستلو په ګډون ګڼ افدامات وکړل.
سره له دې چې پاکستان یې هم په ځوابي توګه پر وړاندې ګڼ اقدامات ترسره کړل؛ خو د پاکستاني پوځیانو لهخوا بیا بېګا شپه هم د پرلپسې ۱۲مې ورځې لپاره په پوله ډزو دوام لاره.
د پاکستان د بهرنیو چارو وزارت وایي، چې د دوی په غوښتنه د ملګرو ملتونو د امنیت شورا په غونډه کې د هند د پاروونکو اقداماتو له امله د سیمهییز امنیت د خرابېدو په اړه بحث شوی دی.
د پاکستان د بهرنیو چارو وزارت لهخوا په دې تړاو په خپرې شوې خبرپاڼه کې راغلي، چې دغه ناسته «د هند او پاکستان پوښتنې» تر عنوان لاندې ترسره شوه.
په خبرپاڼه کې راغلي، چې د ملګرو ملتونو امنیت شورا غړو د تاوتریخوالي د زیاتېدونکي ګواښ په اړه اندېښنه څرګنده کړه او له دواړه خواوو یې د زغم او تاوتریخوالي کمولو غوښتنه وکړه.
د خبرپاڼې له مخې؛ پاکستان په دغه ناسته کې د هند تورونه بې بنسټه یاد کړل او هغه یې په کلکه رد کړل او دا یې د کشمیر خلکو د خپلواکۍ لپاره د مبارزې د کمزورې کولو لپاره یوه دسیسه یاده کړې ده.
خبرپاڼې دارنګه د ملګرو ملتونو د امنیت شورا او د دغه شورا د غړو لهخوا د خبرو اترو او تاوتریخوالي کمولو وړاندیز هرکلی کړی دی.
د خبرپاڼې په وروستۍ برخه کې راغلي، د هند او پاکستان مسله د ملګرو ملتونو د امنیت شورا د اجنډا یو له پخوانیو موضوعاتو ده.
د ملګرو ملتونو امنیت شورا د پاکستان په غوښتنه دغه بېړنۍ غونډه د تړلو دروازو تر شا ترسره کړه.
خو تر دغې ناستې وړاندې بیا هندي رسنیو ویلي و، چې د هند د بهرنیو چارو وزیر اېس جي شنکر له پاکستان او چین پرته د دغه شورا ټولو غړو سره خبرې کړې دي.
له دې سربېره د ایران په ګډون یو شمېر هېوادونو هم د پاکستان ـ هند ترمنځ د روان کړکېچ د حل لپاره اقدامات کړي دي.
د تهران ټایمز د راپور له مخې، د ایران د سوداګرۍ، صنایعو، کانونو او کرنې خونې مرستیال پیام باقري ویلي، چې دغه هېواد د سیمهییز ثبات د پیاوړتیا لپاره له افغانستان سره ستراتیژیکه سوداګریزه ملګرتیا غواړي.
د تهران ټایمز د راپور له مخې، پیام باقري د ایران او افغانستان تر منځ د ګډو سوداګریزو فرصتونو د رامنځته کولو غوښتنه کړې.
ښاغلي باقري دغه څرګندونې د ایران د سوداګریزو فرصتونو په اړه جوړ شوي کنفرانس کې کړې او زیاتوي، چې: «ایران او افغانستان کولی شي د خپلو اړوندو سرچینو او وړتیاوو په کارولو سره د ګټو لپاره ښه ملګرتیا رامینځته کړي.»
هغه زیاته کړې: «د ایران پرمختللې صنعتي زیربنا او نړۍوالو بازارونو ته لاسرسی، د افغانستان د معدني شتمنیو، حاصلخیزې ځمکې او ځوان کاري ځواک سره یوځای به کولای شي، دوی طبیعي اقتصادي شریکان جوړ کړي.»
د تهران ټایمز د راپور له مخې، باقري د دواړو هېوادونو ترمنځ ګډې ژبنۍ، کلتوري او تاریخي اړیکې د اقتصادي ودې، سوداګرۍ د پراختیا او دوامداره اړیکو لپاره یو قوي بنسټ او ګټې اساسي فکتور وباله.
بلخوا بیا څو ورځې وړاندې د ایران د کرنې وزیر غلام رضا نوري د طالبانو د یوه پلاوي سره په ناسته کې وویل: «ایران چمتو دی چې افغانستان ته د کرنې په برخه کې تخنیکي او انجینري خدمات صادر کړي.»
نوري زیاته کړه، ایران او افغانستان ژورې کلتوري او تاریخي اړیکې لري او په بیلابیلو برخو کې د نږدې همکارۍ په لټه کې دي:«مونږ افغان مسلکي کسانو ته د کرنې تخصص او پوهه لیږدولو لپاره اړین زیربنا او ظرفیت لرو.»
وروستي معلومات ښیي چې تېر کال د ایران او افغانستان ترمنځ په سوداګرۍ کې د پام وړ زیاتوالی راغلی، او د دوه اړخیزې سوداګرۍ حجم د تیر کال په پرتله نږدې ۸۴ سلنه زیات شوی چې ټولټال ۳.۱۹۷ میلیارده ډالرو ته رسېږي.
ایران د افغانستان لپاره یو لومړنی عرضه کوونکی هېواد ګرځیدلی، چې د وارداتو شاوخوا ۲۵ سلنه برابروي.
د یادولو وړ ده، چې د ایران مهم صادرات تیل او د تیلو تصفیې محصولات، فولاد، کرنیزې توکي او ساختماني مواد دي.
پاکستاني رسنۍ جیونیوز راپور ورکړی، چې بلوچستان کې یې د هند په ملاتړ یو لوی «ترهګریز» پلان افشا کړی. په راپور کې د استخباراتي سرچینو په حواله راغلي، چې د هند استخباراتي ادارې «را» د بلوچستان په بېلابېلو سیمو کې نیابتي ډلې فعالې کړې دي.
استخباراتي سرچینې وايي، چې د هند «را» په ګوادر، کویټه او خضدار کې ترهګریز پلانونه جوړ کړي دي.
د راپور له مخې؛ «را» بلوڅ بېلتون پاله ډله، ټيټيپي او بې اسناده افغان کډوالو ته لارښوونه کړې، چې په دغه ښارونو کې ترهګريز فعالیتونه ترسره کړي.
د پاکستان استخباراتي سرچینو زیاته کړې، چې «را» هم «ترهګر» د افغانستان اړوندو سیمو ته د عملیاتو لپاره لېږلي دي.
خو دا هغه ادعاوې دي چې هند او پاکستان یې یو پر بل کوي او په دې اړه شواهد نه دي وړاندې شوي.
د پاکستان د استخباراتي سرچینو په وینا، ځینو ځانمرګو بریدګرو ته د اړوندو سیمو د څارنې دنده ورکړل شوې وه او ښایي دغه ځانمرګي بریدګر په «ترهګریزو» فعالیتونو کې له موټر یا موټرسایکل کار واخلي.
جیونیوز د استخباراتي سرچینو په حواله زیاتوي، چې امنیتي ادارې یې د هند تر ملاتړ لاندې د «ترهګریزو» پلانونو شنډولو لپاره لاس په کار شوې دي.
استخباراتي سرچینو ویلي دي، چې په بلوچستان کې د هند د «ترهګرۍ» روښانه شواهد لا دمخه څرګند شوي او هند غواړي په بلوچستان کې د «ترهګرۍ» په هڅولو سره پاکستان ناکراره کړي.
د هند او پاکستان کړکېچ
(د اپرېل په ۲۲مه) د هند تر ولکې لاندې د کشمیر په پهلګام کې په یوه مېله ځای کې د ډزو په یوه پېښه کې ۲۶ سېلانیان ووژل شول او لسګونه نور ټپیان شول.
تر دغه برید وروسته د هند حکومت د پهلګام پېښې په تړاو د پړې ګوته پاکستان ته ونیوله او د دواړه خواوو لهخوا د یو بل پر وړاندې ګڼ ګامونه واخیستل شول.
خو پاکستان بیا د هند دغه ادعا ردوي.
په افغانستان او عراق کې د امریکا د پوځ د ناکامیو په هکله د نیویارک ټایمز او نیویارکر چمتو شویو راپورونو د ۲۰۲۵ کال دوه جایزې ګټلې دي.
د پولیټزر د داورانو پلاوي په وینا، د نیویارک ټایمز راپور په واضیح توګه وښوده چې «څنګه متحدهایالاتو د انسانوژنکو سیمهییزو ملېشو په ملاتړ، خلک طالبانو ته اړ کړل او په افغانستان کې یې د خپلې ماتې تخم وکاره.»
د نیویارک ټایمز د راپور پر بنسټ، د ملېشو یو سیمهییز قوماندان چې د امریکا د پوځ ملاتړ یې درلود، د خلکو په ورکېدو کې ښېکل و.
همداراز، نیویارک ټایمز د سوډان د کورنۍ جګړې په اړه د غوره بهرني راپور، په پنسلوانیا کې د ډونالډ ټرمپ د ناکامې وژنې هڅې د شېبو غوره عکس او په متحدهایالاتو کې د مخدره توکو د ناوړه کارونې د وژونکي ناورین په تړاو د ګډ راپور لپاره درې جایزې ترلاسه کړې.
د رویټرز خبري اژانس هم د څېړنیزو راپورونو په برخه کې د پولیټزر جایزه ګټلې ده.
دا جایزه دوی ته د هغو راپورونو لپاره ورکړل شوې، چې د فنتانیل د تولید لپاره کارېدونکو کیمیاوي توکو د نړۍوالې سوداګرۍ په اړه جوړ شوي و.
دې مادې په تېرو څو کلونو کې شاوخوا ۴۵۰ زره امریکایان مړه کړي دي.
د رویټرز خبریالانو د دغه راپور د جوړېدو پر مهال وکړای شول د فنتانیل د جوړونې لپاره ټول اړین توکي وپېري، څو دا وښيي هغه چینايي کیمیاوي توکي چې د امریکا د مصنوعي نشهيي توکو بازار تغذیه کوي، تر کومې کچې ارزانه او په اسانۍ سره موندل کېږي او ولې د امریکا چارواکي د دې مرګوني سوداګرۍپه درېدو کې نه بریالي کېږي.
د رویټرز څېړنیزې ډلې یوازې په ۳ زره او ۶۰۰ ډالرو هغه اړین توکي او تجهیزات وپېرل چې لږترلږه د ۳ مېلیون ډالرو په ارزښت فنتانیل تولیدولای شي.
والسټریټ ژورنال د خپل راپور لپاره چې د اېلان ماسک د سیاسي او شخصي بدلونونو په اړه و، د ملي راپور جایزه ترلاسه کړې، خو د واشنګټن پوست ورځپاڼې د ټاکنیز کمپاین پرمهال د ډونالډ ټرمپ د ناکامه وژنې په اړه د غوره بېړني خبر جایزه ګټلې ده.
د نورو مهمو نشریو په منځ کې نیویارکر اوونیزې درې جایزې ګټلې دي.
د پروګرام داورانو یادې اوونیزې نشریې ته د غزې په اړه د غوره تبصرې، غوره تصویري راپور او غوره پوډکاسټ جایزې ورکړې دي.
پروپبلیکا په ټوله امریکا کې د سقط جنین بندیز اغېزو په اړه د راپور ورکولو له امله د عامه خدمتونو جایزه ترلاسه کړې ده.
د یادونې ده، چې د پولیټزر جایزه له ۱۹۱۷ کال راهیسې هر کال د ژورنالېزم او ادبیاتو ښو کارونو ته ځانکړې کېږي.
په ټولییزه توګه پولیټزر ۱۵جایزې د ژورنالېزم بېلابېلو څانګو ته او اته یې هنري لکه، موسیقي تیاتر او داستانلیکلو ته ورکول کېږي.
