د سوریې لنډمهالی ولسمشر احمد الشرع نن چهارشنبه په پاریس کې د خپل لومړي اروپايي سفر پر مهال له فرانسوي ولسمشر ایمانویل ماکرون سره خبرې کوي، چې د خپل جګړه ځپلې هیواد د ثبات لپاره نړیوال ملاتړ ترلاسه کړي.
الشرع چې د بشار اسد له حکومت وروسته د سوریې مشر ټاکل شوی، له ملګرو ملتونو د سفر لپاره معافیت ترلاسه کړی.
د فرانسې چارواکو وویل، چې د دواړو مشرانو ترمنځ خبرې به په هغو موضوعاتو باندې متمرکزې وي چې د سوریې حاکمیت او امنیت، د اقلیتونو د ساتنې تدابیر او له اسلامي دولت (داعش) سره د مبارزې هڅې او د بشري مرستو او اقتصادي ملاتړ همغږۍ پکې شاملې دي.
د فرانسې د بهرنیو چارو وزیر ژان نویل بارو وویل: « موږ یو تش چک نه لرو او موږ به د عمل پراساس هغه و ارزوو».
هغه زیاته کړه، چې پاریس غواړي ډاډ ترلاسه کړي چې سوریه د ډلو ترمنځ د تاوتریخوالي مخنیوي لپاره او له داعش سره د مبارزې لپاره هوډ لري.
د هندو ورځپاڼې د راپور له مخې، دغه ورځپاڼې ته یوه هندي چارواکي ویلي چې له برید وروسته لږ تر لږه درې هندي جیټ الوتکې د جمو او کشمیر په اخنور، رامبان او پامپور سیمو کې لوېدلي دي.
هندو ورځپاڼې دغه خبر په خپله ایکس پاڼه خپور او وروسته بیرته له پاڼې لرې کړی دی.
دغې هندي ورځپاڼې د الوتکو د لوېدلو د لامل په اړه څه نه دي ویلي.