د اوکراین ولسمشر ولادیمیر زيلينسکي وايي، د امریکا ولسمشر ډونالډ ټرمپ ته یې ویلي که روسيه بې له قید او شرطه اوربند عملي کوي، دوی چمتو دي، چې په هره بڼه د سولې خبرې پيل کړي. نوموړی زياتوي، چې له ټرمپ سره یې د جګړې د وضعت د څېړولو ترڅنګ روسيې ته د ۳۰ ورځو اوربند وړانديز کړی.
د اوکراین ولسمشر ولادیمر زيلينسکي د پنجشنبې په ورځ د (غويي ۱۸مه) پر اېکس پاڼه لیکلي، چې د امریکا له ولسمشر سره یې د جګړې د وضعت د څېړولو په اړه خبري کړي او دامهال د ۳۰ ورځني اوربند د منلو په اړه د مسکو ځواب ته په تمه دي.
نوموړي لیکلي، که روسیه رښتیا جګړه ختمول غواړي باید خبرې له اوربند څخه پیل کړي.
زيلينسکي ټينګار کړی، چې اوکراین ډيپلوماسۍ ته ژمن دی.
تر دې وړاندې د کریملین یوه ویاند ادعا کړې وه، چې کییف د خبرو اترو لپاره جدي نه دی، خو اوکراین وایي چې لا هم د مسکو عملي اقداماتو ته په تمه دی.
