طالبان وایي، پنجشېر کې یې د شاوخوا ۹۷ زره ډالرو په ارزښت زمرد پلورلي دي
په پنجشېر ولایت کې د طالبانو د والي ویاند سیف الدین لټون وایي، چې دغې ډلې په پنجشېر کې د ۹۷ زره او ۵۰۰ ډالرو په ارزښت زمرد په افغان سوداګرو پلورلي دي.
نوموړي د طالبانو تر واک لاندې باختر اژانس ته ویلي، چې دغه زمرد شاوخوا ۲زره او ۸۴ قیراطه وو.
په پنجشېر ولایت کې د طالبانو د کانونو او پټرولیم ریاست وایي، چې دا مهال په دغه ولایت کې د زمردو کان ۲۱ نوې سيمې رامنځته شوې او کان کېندنې پکې روانې دي.
د دغه ریاست په وینا، په پنجشېر کې د زمردو شاوخوا ۶۰۰ شرکتونه رسمي جوازونه لري او په کارونو بوخت دي.