خواجه اصف: د نریندرا مودي د واک ورځې د ګوتو په شمار پاتې دي
د پاکستان دفاع وزیر خواجه اصف ویلي، چې «د هند لومړی وزیر نریندرا مودي په کوردننه د پارلمان او بهر له سختو نیوکو سره مخ دی او د هغه ورځې د ګوتو په شمار پاتې دي». نوموړی وايي، «وروستۍ پرېکړه به د هند ولس کوي.»
ایکسپریس ټربیون پاکستانۍ رسنۍ د سې شنبې په ورځ راپور ورکړی، چې خواجه محمد اصف دا څرګندونې له خبریالانو سره د خبرو پر مهال وکړې او ویې ویل چې د هند او پاکستان ترمنځ هر ډول راتلونکی خبرې به یوازې هغه وخت ممکنې وي چې پر دریو اساسي موضوعاتو بحث وشي.
هغه ترهګري، د کشمیر لانجه او د اوبو شخړې هغه درې موضوعګانې یادې کړې چې د هغه په وینا باید له هند سره پرې خبرې وشي.
هند له دې وړاندې ویلي و، چې ددوی ترمنځ هیڅ خبرې اترې نشته.
اصف وویل، «پاکستان له تېرو ۲۵ کلونو راهیسې د ترهګرۍ قرباني دی او ناعادلانه تورن شوی».
هغه ټینګار وکړ چې نړیوال باید د پاکستان دا هڅې وګوري. نوموړي زیاته کړې، چې د لومړي وزیر شهباز شریف له خوا د وروستیو پېښو د څېړنې وړاندیز لا هم پر مېز دی، خو پاکستان د خبرو اترو لپاره دا غواړي چې د ترهګرۍ پر وړاندې یې رول په رسمیت وپېژندل شي.
هغه د کشمیر په اړه وویل، چې دا شخړه لا هم حل شوې نه ده او د هر ډول مذاکراتو برخه باید وي. همداراز، هغه د اندس د اوبو تړون ته اشاره وکړه او خبرداری یې ورکړ چې د دې تړون سیاسي کول به سیمهییز ثبات له خطر سره مخ کړي.
خواجه اصف هند د ترهګرۍ په اوږدمهاله ملاتړ تورن کړاو ادعا یې وکړه چې د هند مداخله په کاناډا او امریکا کې هم ثابته شوې ده. هغه ټینګار وکړ چې دا شواهد باید د خبرو پر مهال وړاندې شي.
د هند او پاکستان ترمنځ د اوربند اعلان د مې پر ۱۰مه وشو، چې دواړه هېوادونه یې د جګړې له ژورې راوېستل. دا اوربند لومړی د امریکا ولسمشر ډونالډ ټرمپ اعلان کړ او وروسته د دواړو هېوادونو چارواکو تایید کړ.
خو له اوربند څو ساعته وروسته، د کنټرول کرښې دواړو خواوو کې بیا د ډزو تبادله وشوه او په سرینګر کې چاودنې وشوې، چې د اوربند د پایښت په اړه اندېښنې یې زیاتې کړې.
د پاکستان د پوځ ویانداحمد شریف چودري، وویل چې پاکستان د اوربند غوښتنه نه ده کړې، بلکې هند د پاکستان له غبرګون وروسته د اوربند غوښتنه وکړه. هغه دا هم وویل چې د اټومي ځواک لرونکو هېوادونو ترمنځ جګړه "ناممکنه" او "بېمانا" ده.
له دې وړاندې نیویارک ټایمز د خپلو سرچینو په حواله ویلي و، چې کله هند پر نورخان هوايي اډه ، چې د پاکستان د اتومي قوماندې مرکز ته نږدې پرته ده، برید وکړ، سپینې ماڼۍ مداخله وکړه او اوربند اعلان شو.