د سعودي د ماليې وزیر محمد الجدعان او د امریکا د خزانې وزیر سکاټ بیسنټ د سې شنبې په ورځ د سعودي-امریکا د پانګونې فورم په پیل کې یوه ګډه ناسته وکړه. بیسنټ تایید کړه چې د امریکا ولسمشر ډونالډ ټرمپ د امریکا د اقتصاد پر بېرته پیاوړي کولو تمرکز کړی.
هغه ټینګار وکړ: « له چین سره د سوداګرۍ توازن د ټرمپ د ادارې لومړیتوب دی، موږ به هڅه وکړو چې د ستراتیژیکو سکتورونو لپاره له چین څخه ځان راټول کړو».
الجدعان د سعودي او امریکا د اړیکو په اړه خبرې وکړې. هغه وویل چې د دواړو هېوادونو تر منځ اړیکې ورځ تر بلې پیاوړې کېږي.
د سعودي ګزیټه د رپوټ له مخې، الجدعان وویل: «موږ د سعودي عربستان په تاریخ کې تر ټولو ټیټه بېروزګاري لرو».
هغه زیاته کړه: «په روزګار کې ستر بدلون راغلی، ښځې پیاوړې شوې دي او موږ هغه هدف ته رسېدلي یو چې غوښتل مو د ۲۰۳۰ کال تر پایه یې ترلاسه کړو، چې ۷ سلنه و».
په دې فورم کې د ټیسلا اجرایوي مشر ایلان ماسک، د امازون مشر اندي جاسي، د بلک راک مشر لري فینک او ډیویډ ساکس هم ګډون لري.
فینک د خپلې وینا پر مهال څرګنده کړه چې سعودي عربستان اوس د نړیوالو پانګونو لپاره یو مهم مرکز ګرځېدلی.
دا فورم به پر مصنوعي ځیرکتیا، تکنالوژیکي پرمختګونو او د سعودي او امریکا تر منځ د پانګونې پر موضوعاتو تمرکز وکړي.
