د ژغورنې نړۍوالې کمیټې (ایارسي) د بیا استوګنې، پناه غوښتنې او ادغام د پروګرامونو مشر هانس وان دی ویرد، د امریکا د کورنیو چارو وزارت له خوا د افغانستان لپاره د لنډمهاله خوندي وضعیت (ټيپيایس) د ختمولو پرېکړې په اړه اندېښنه ښودلې.
هانس وان دی ویرد د سې شنبې په ورځ وویل: «موږ د امریکا د کورنیو چارو وزارت له دې پرېکړې ژوره اندیښنه لرو. که دا پرېکړه نافذه شي، نو له ۹۰۰۰ زیات افغانان به د اخراج له خطر سره مخ شي».
یاده کمیټه وايي، افغانستان دنړیوالې ژغورنې کمېټې د ۲۰۲۵ کال په اضطراري څار لېست کې د نړۍ یو تر ټولو کمزوری بشري بحران لرونکو هېوادونو په توګه ثبت شوی او د(ټيپيایس)لرونکو افغانانو بیرته ستنول به د دې وضعیت په لا بدتره کولو کې مرسته وکړي.
هغه زیاته کړه: "د(ټيپيایس) لرونکي افغانان د امریکا په ټولنو، ښوونځیو او کاري ځایونو کې ارزښتناک غړي دي. د لنډمهاله خوندي وضعیت پای ته رسېدل نه یوازې هغو کسانو ته زیان رسوي چې د امنیت او ساتنې لپاره پرې تکیه کوي، بلکې هغو ټولنو ته هم تاوان رسوي چې د هغوی له ونډې څخه ګټه اخلي."
د ژغورنې نړیوالې کمیټې له ۲۰۲۱ کال راهیسې، امریکا کې د ۱۲ زره افغانانو لپاره قضایي، د استوګنې، کار ملاتړ او حقوقي خدمات وړاندې کړي دي.
د ژغورنې نړیوالې کمیټې مشر په دې اړه وویل: «موږ د امریکا له حکومت څخه غواړو چې عاجل دې دغې زیانمنې پالیسۍ ته بیا کتنه وکړي.»
چارواکو ویلي، د تورخم په پوله یې د (TAD) ختمېدو اعلانونه په ښکاره ځایونو کې لګولي دي او افغان موټر چلوونکو ته یې په شفاهي توګه هم ویلي چې له دې وروسته به یوازې هغه کسان پاکستان ته پرېښودل کېږي چې پاسپورټ کې د اعتبار وړ ویزه ولري.
پاکستاني چارواکي دې ته د یو سند رژیم نوم ورکړی او د دوی په وینا دا د پاکستان هغې پالیسۍ ته اشاره کوي چې پر بنسټ یې افغان وګړي باید پاکستان ته د داخلېدو، وتلو او استوګنې لپاره د اعتبار وړ پاسپورټ او ویزه ولري.
افغانستان انټرنشنل په تورخم کې له چارواکو سره د موقتي داخلېدو سند (TAD) د تمدید په اړه خبرې کړې دي.
چارواکو ویلي، افغان موټر چلوونکو ته خبر ورکړل شوی چې د یاد سند د اعتبار موده به د روانې میاشتې تر پایه پای ته ورسېږي. خو دا لا روښانه نه ده چې دا اسناد به بېرته تمدید شي او که نه.
چارواکو دا هم ویلي چې دغه سند له دې مخکې تمدید شوی دی.
چارواکو زیاته کړې، د دواړو ګاونډیو هېوادونو ترمنځ د سوداګرۍ د تنظیم لپاره، د دواړو هېوادونو موټر چلوونکو ته ځانګړې اسانتیا ورکړل شوې وه چې د سوداګریزو توکو د انتقال لپاره دواړو خواوو ته تګ راتګ وکړای شي.
خو ډېری موټر چلوونکي له پاسپورټ پرته وو، یا یې د مالي ستونزو له امله نهشوای کولای پر وخت اړین اسناد تر لاسه کړي.
د دې ستونزې د حل لپاره، د دواړو هېوادونو د سوداګرۍ وزارتونو پر موقتي داخلېدو سند (TAD) هوکړه وکړه، چې د ۲۰۲۴ کال د می له لومړۍ نېټې څخه نافذ شو. دغه سند موټر چلوونکو او د هغوی همکارانو ته چې د سفر قانوني اسناد نهلري، موقتي قانوني اسانتیا برابره کړې وه.
یاد اقدام د دې لپاره و چې د دواړو هېوادونو ترمنځ د سوداګریزو وسایطو تګ راتګ تنظیم او قانوني شي او پر فعالیتونو ښه څارنه وشي.
