د پښتون ژغورنې غورځنګ مشر منظور احمد پښتين په ګلګت بلتستان کې د پاکستاني پوځ له لورې د عوامي عمل کمېټې د غړو نیول کېدل وغندل. نوموړي ویلي، «دا نيونې پر محکومو قومونو د پنجابي جنرالانو د استعمار د پاليسو دوام دی.»
د پښتون ژغورنې غورځنګ مشر منظور احمد پښتين د چهارشنبې په ورځ (د غويي ۲۴مه) پر خپلې فېسبوک پاڼې د پاکستان ادارې له لوري د ګلګت بلتستان د عوامي عمل کمېټې د مشرتابه، غړو او یو شمېر نورو مشرانو نیونه غندلې ده.
نوموړي ویلي: «د پاکستان پوځ له لورې د پښتون ژغورنې غورځنګ او بلوڅ پيوستون کمېټې نه وروسته د ګلګت بلتستان د عوامي عمل کمېتې باندي فشار او نیونې د پنجابي جنرالانو د استعمار د پاليسو دوام دی.»
نوموړي د ګلګت بلتستان مشرانو ته په خپل پيغام کې ډاډ ورکړی چې د پښتون ژغورنې غورځنګ یې تر څنګ ولاړ دی او په سختو حالاتو کې به یې غږ پورته کوي.
منظور احمد پښتين له محکومو پښتونو، بلوڅو، سندهي کډوالو، کشميري او د ګلګت بلتستان له خلکو غوښتنه کړې، چې سره یو شي او یو د بل په درد کې لاس سره ورکړي.
