د ناروې د کډوالو شورا وایي، چې په تېر ۲۰۲۴ کال کې په افغانستان کې د اقلیمي بدلونونه له امله شاوخوا ۱.۳ میلیونه کسان داخلي بېځایه شوي دي. دغه کډوال د افغانستان له بیلابیلو ولایتونو یوه او بل ولایت ته کوچیدلي دي.
دغه شورا په خپل یو تازه راپور کې د افغانستان د بیځایه شویو کډوالو تر څنګ ویلي، چې اقلیمي بدلونونو او سېلابونو ۴۲ سلنه کسان د نړۍ په هر براعظم کې بې ځایه کړي دي، چې له چاد څخه نیولې تر برازیله، له افغانستان څخه تر فیلیپین او په ټوله اروپا کې یې خلک داخلي بې ځایه کړي دي.
په راپور کې راغلي، چې په نړۍ کې د داخلي بې ځایه شویو کسانو شمېر د ۲۰۲۴ کال په پای کې ۸۳.۴ مېلیونو ته ورسېده، چې دا تر دې دمه ټولو لوړه شمېره ښیي.
د راپور له مخې؛ د داخلي بې ځایه کېدو لوی لاملونه شخړه، بې وزلي او اقلیمي بدلونونه ښودل شوي دي.
د داخلي بې ځایه کېدنې د څارنې مرکز IDMC رییس الکسانډرا بیېاک ویلي:« دغه شمېرې ښیي، چې داخلي بې ځایه کېدنه یوازې یو بشري ناورین نه دی؛ بلکې یوه سیاسي ننګونه هم ده، چې د اوسني وخت پرتله خورا ډېرې پاملرنې ته اړتیا لري.»
د دغه راپور له مخې؛ په نړۍ کې نږدې ۹۰ سلنه کسان چې ټولټال ۷۳.۵ مېلیونه خلک کېږي، د شخړو او تاوتریخوالي له امله بې ځایه شوي دي.
د ناروې د کډوالو شورا عمومي مشر جان اېګلند وایي، داخلي بې ځایه کېدنه په ندرت سره مخ په زیاتېدو ده؛ خو د داخلي بې ځایه شویو کسانو لپاره ښایي دغه له کړاوه ډک ژوند د څو کلونو لپاره دوام وکړي.
د راپور له مخې؛ یوازې امریکا په نړۍ کې د بېځایه شویو کسانو نږدې څلورمه برخه جوړوي.
