اسراییلي چارواکی: د ټرمپ د طرحې په عملي کېدو سره به غزه په نوي دوبۍ بدل شي
د اسراییل یوه لوړپوړي چارواکي نیوزویک ته ویلي، چې بنیامین نتنیاهو لا هم د ډونالډ ټرمپ له هغه لیدلوري ملاتړ کوي، چې غزه باید د منځني ختیځ د پام وړ په سیمې بدل شي.
د اسراییل یوه لوړپوړي چارواکي نیوزویک ته ویلي، چې بنیامین نتنیاهو لا هم د ډونالډ ټرمپ له هغه لیدلوري ملاتړ کوي، چې غزه باید د منځني ختیځ د پام وړ په سیمې بدل شي.
هغه دغه راز ټينګار کړی، چې د غزې تړانګه د پام وړ ظرفیتونه لري او که دا پلان عملي شي، نو کولای شي د متحده عربي اماراتو په څېر یوه بېلګه شي.
هغه زیاته کړه: «زه له دې پلان څخه ملاتړ کوم. زما بېلګه امارات دي. غزه اوږده ساحلي کرښه، پراخ سمندر او ښه مناسبه هوا لري. دلته د اوبو د خوږولو دستګاوې کارېدلی شي، اوبه پلورل کېدای شي او په کرنیزو، ټېکنالوژۍ او د خوړو په صنعتونو کې پانګونه کېدای شي.»
دغه څرګندونې په داسې حال کې کېږي، چې څه موده مخکې د متحده ایالاتو ولسمشر ډونالډ ټرمپ د فلسطینیانو د جبري بېځایه کولو او د غزې د "نیولو" وړاندیز کړی و.
الجزیرې بیا د امریکایي او اسراییلي چارواکو له حوالې راپور ورکړی و، چې متحده ایالاتو او اسراییل د ختیځې افریقا له درېیو حکومتونو سره د غزې څخه سوډان، سومالیا او سومالیلینډ ته د فلسطینیانو د جبري بېځایه کېدو په اړه خبرې کړې دي.
په راپور کې دا هم ویل شوي و، چې د سوډان چارواکو ادعا کړې چې د متحده ایالاتو وړاندیزونه یې رد کړي دي؛ خو د سومالیا او سومالیلینډ چارواکو بیا ویلي، چې دوی له دغې موضوع بې خبره دي.
