پاکستاني استخباراتو د منظور پښتین ورور نیولی او ناڅرګند ځای ته یې لېږدولی دی

د پښتون ژغورنې غورځنګ مخکښ غړی حنیف پښتین وایي، د پاکستان استخباراتو نن د یاد غورځنګ د مشر منظور احمد پښتین کشر ورور په اسلام اباد کې بېولی او تراوسه پورې لادرکه دی.

نوموړي په خپل اېکس کې لیکلي، چې د منظور پښتین کورنۍ هره ورځ د ای اېس ای او نورو ریاستي ادارو له لوري تعقیب او ځورول کېږي.
پښتین همداراز ویلي، چې د منظور احمد پښتین ورور غازي امان الله د چهارشنبې په ورځ لومړی په یوه روغتون کې ونیول شو خو بېرته ژر خوشې شو، خو کله چې خپل استوګنځي ته وګرځېد یو ځل بیا ونیول شو او لادرکه شوی دی.
د پښتون ژغورنې غورځنګ یاد مخکښ غړی وایي: «یوه ورځ نه ده، بلکې هره دویمه درېیمه ورځ د مشر منظور پښتین کورنۍ تعقیب او ځورول کېږي، ان چې د کورنۍ یو ناروغ یې هم روغتون ته ځي د دوی (ای اېس ای) له خوا تعقیب او ځورول کېږي.»
د نوموړي په وینا: «نن په اسلام اباد کې د مشر منظور پښتین وړوکی ورور غازي امان الله د ای اېس ای او نورو ریاستي ادارو له خوا یو ځل نیول شوی و او سخت تشدد پرې شوی و، خو هغه چې بېرته خپل روم ته ولاړ هلته بیا ورغلل او په وهلو ټکولو یې پټې سترګې وړی دی چې تر اوسه پورې لادرکه دی.»
د ښاغلي پښتین په خبره، هر کله چې د منظور پښتین د کورنۍ غړي وهل او ځورول کېږي، ریاستې ادارې له دوی څخه د نوموړي د اوسېدو د ځای پوښتنه کوي.
د پښتون ژغورنې غورځنګ مخکښ غړی حنیف پښتین دغه راز زیاتوي: «که څه هم مشر په هر وخت کې د تنظیم ملګري له دې خبرې منع کړي او وایي چې زما په کورني مشکل کې به غږ نه پورته کوئ، البته که په بل هر پښتون مشکل وو، ورسره ودرېږئ.»

نوموړی دغه څرګندونې په داسې حال کې کوي، چې منظور احمد پښتین هېڅکله په دې تړاو خبرې نه دي کړي، چې کورنۍ یې د پاکستان د استخباراتو یا نورو ادارو له خوا ځورول کېږي.
دا په داسې حال کې ده، چې تر دې وړاندې هم د علي وزیر په ګډون د پښتون ژغورنې غورځنګ غړي د پاکستان د استخباراتو له خوا نیول شوي او تراوسه یې هم برخلیک روښانه نه دی.
د پښتون ژغورنې غورځنګ یاد غړی نهه میاشتې وړاندې د ۲۰۲۴ کال په درېیمه نېټه د اسلام اباد په پېمز روغتون کې له بېړنۍ څانګې څخه پولیسو ونیوه او تراوسه زنداني دی.