د طالبانو یو پلاوی د کاسا ۱۰۰۰ پروژې په ناسته کې د ګډون په موخه تاجکستان ته ولاړ
د طالبانو تر واک لاندې د برېښنا شرکت وایي، چې د دغه شرکت د اجرایه مشر عبدالباري عمر په مشرۍ یو پلاوی د کاسا زر پروژې په اړه ناسته کې د ګډون په موخه تاجکستان ته ولاړ.
د طالبانو تر واک لاندې د برېښنا شرکت وایي، چې د دغه شرکت د اجرایه مشر عبدالباري عمر په مشرۍ یو پلاوی د کاسا زر پروژې په اړه ناسته کې د ګډون په موخه تاجکستان ته ولاړ.
دغه شرکت په یوه خپره کړې اعلامیه کې ویلي، چې په یاده ناسته کې د کوربه تاجکستان په ګډون د قرغزستان، افغانستان، پاکستان او اسلامي پراختیایي بانک استازي هم ګډون کوي.
د اعلامیې له مخې؛ په دغه ناسته کې به د پروژې په اړه «هر اړخیزې» خبرې وشي.
په اعلامیه کې راغلي، په جوړې شوې ناسته کې به د پروژې د چارو په اوسني وضعیت، پرمختګونو، د ستونزو پر حل لارو او ګڼو نورو اړخونو او راتلونکو پلانونو خبرې وشي.
اعلامیه زیاتوي، چې د برېښنا شرکت د نړۍوال بانک په مالي ملاتړ د دغه پروژې بشپړولو ته ژمن دی.
تر دې وړاندې د تېر کال په کب میاشت کې نړۍوال بانک ویلي و، چې په افغانستان کې د کاسا-۱۰۰۰ د برېښنا د لېږد مزي پروژې د جوړولو کار د دغې پروژې د شریکو هېوادونو قرغزستان، ازبکستان او پاکستان په غوښتنه پیلوي.
د نړۍوال بانک د پرېکړې له مخې، د کاسا ۱۰۰۰ پروژې د جوړولو ټول لګښتونه به له افغانستانه بهر او د طالبانو له اداري سیسټمونو لرې اداره کېږي.
که څه هم دغه پروژه د طالبانو تر واکمنۍ وروسته ځنډېدلې وه؛ خو نړۍوال بانک د تېر کال په وروستیو کې وويل، چې اوس به پر دې پروژې ۱۱۰ مېلیونه ډالر ولګول شي.
د کاسا ۱۰۰۰ پروژه له منځنۍ اسیا څخه سوېلي اسیا ته برېښنا لېږدوي. دغه پروژه په ۲۰۱۶ کال کې په تاجکستان کې د سیمهییزو هېوادونو مشرانو په ګډون پرانیستل شوه او ټاکل شوې وه، چې د ۲۰۲۲ کال تر مارچ میاشتې پورې بشپړه شي.
د کاسا ۱۰۰۰ پروژه د ۵۰۰ کیلو واټه برېښنا په لرلو د افغانستان له اوو ولایتونو تېرېږي او له پاکستان سره نښلول کېږي.
