جيونیوز ویلي، چې پاکستان کرېکټ بورډ د سوپر لیګ پاتې لسو لوبو لپاره د بهرنيو لوبغاړو لیستونه نهايي کوي. په دې سیاليو کې د نورو بهرنيو لوبغاړو ترڅنګ افغان لوبغاړي محمد نبي، نجیب ځدران او ګلبدين نایب هم لوبيږي.
جیونيوز د پنجشنبه په ورځ د پاکستان کرېکټ بورډ د مسولينو له قوله لیکلي، چې د جنوبي افریقا رایلي روسو، د نیوزيلنډ فن ایلن او افغان لوبغاړي ګلبدين نایب به د کويټې ګلیډيټرز د لوبډلې برخه وي.
د اسلام اباد یونایټیډ په لوبډله کې الکس هېلز او رسي وین ډر دوسن شامل شوي او بین ډوارشیس، ټیمل میلز او جیمي نیشم به هم په په همدې لوبډله کې ولوبيږي.
په خبر کې ویل شوي، چې ډېوېډ وارنر، محمد نبي، او جېمز وینس د کراچي کنګز سره یوځای کېدو ته چمتو دي او دغه لوبډلې د سکاټلېنډ لوبغاړی جارج منسي هم په خپله لوبډله کې شامل کړی دی.
بل لور ته، سکندر رضا، شکیب الحسن او راجاپکسا به د پاتې لوبو لپاره د لاهور قلندرز برخه وي.
د خبر له مخي، چې پېښور زلمي به د لیوک ووډ، کیډمور، نجیب ځدران او مېکس براینټ لوبې نندارې ته وړاندې کړي او د اسټرالیا لوبغاړي جوش براون او پیټر هېټزوګلو به د ملتان سلطانز په لوبډله کې شامل وي.
سرچینې وایي چې د پياېساېل تجاراتي سیالیو پاتې لوبو لپاره غوره شويو لوبغاړو امنیت ته به خاص پام کېږي او لوبډلې کولی شي دغه لوبغاړي د راتلونکو سیالیو لپاره هم له ځان سره وساتي.
څو ورځې وړاندې د پاکستان او هند ترمنځ د تاوتریخوالي له امله د پاکستان کرېکټ سوپر لیګ سیالۍ ځنډول شوې وې؛ خو اوس د اوربند وروسته د دغه لیګ د بیا شروع کېدو خبر ورکړل شوی.
پاکستان کرېکټ بورډ ویلي، چې دغه لوبې به د مې پر ۱۷مه پيل او تر ۲۵مې به دوام وکړي.
د می مياشتې پر ۱۷مه نېټه به پېښور زلمي او کراچي کنګز لوبډلې په راولپنډۍ کې سیالي تر سره کړي.