د ایران د بهرنیو چارو وزارت په غزې تړانګه کې د اسراییل وروستي پرله پسې بریدونه چې سلګونه فلسطینیان پکې ووژل شول، په کلکو ټکو غندلي او د دغه بریدونو په تړاو یې د اسرییلي مشرانو د محاکمې غوښتنه کړې.
د راپورونو له مخې، اسراییلي ځواکونو په غزه او لوېدیځه غاړه کې په وروستیو ۲۴ ساعتونو کې نږدې ۱۴۶ کسان وژلي دي.
د ایران د بهرنیو چارو وزارت ویاند اسماعیل بقایي په یوې اعلامیه کې چې د دغه هېواد د بهرنیو چارو وزارت په اېکس پاڼه کې خپره شوې ویلي، د تېرو ورځو دوامداره بریدونه او جنایتونه په غزه کې په کلکه غندي او د جنوسایډ له امله د اسراییل د مشرانو د معافیت پای ته رسولو او د هغوی د محاکمې او سزا غوښتنه کوي.
یاد ویاند وویل: «اشغالګر رژیم په دې پړاو کې وروسته له هغه چې د اوربند د هوکړې لپاره د منځګړو هڅې ناکامې شوې، خپل جنایتکارانه بریدونه زیات کړي، څو خپلې نامشروع غوښتنې تحمیل او د غزې اوسېدونکي اړ کړي چې کوچېدنه وکړي؛ دا کار به خامخا د فلسطیني ولس له قهرمانانه مقاومت سره مخ شي.»
بقايي د غزې او لوېدیځې غاړې په اړه د بشري حقونو او بشردوستانه اصولو د پراخو سرغړونو عادي ګرځېدل د ملګرو ملتونو د نظام او د نړۍوالو حقوقو لپاره یوه نهجبرانېدونکې فاجعه وبلله.
نوموړي ټینګار وکړ، چې ټول دولتونه او د ملګرو ملتونو سرمنشي قانوني او اخلاقي مسوولیت لري، څو د نسلوژنې، د بشريت ضد جنایتونو او د جنګي جنایتونو د پای ته رسولو لپاره جدي او بېړني ګامونه واخلي.
