د مقاومت جبهه ادعا کوي، چې د پنجشېر ولایت په شهرستان ولسوالۍ کې یې د طالبانو پر یوې قرارګاه د برید په پایله کې ۱۷ طالبانو ته مرګژوبله اړولې ده. یادې جبهې په خپل اېکس کې لیکلي، چې په دې برید کې ۱۳ طالبان وژل شوي او ۴ نور ټپيان دي.
د مقاومت جبهه همداراز زیاتوي، چې په دې برید کې ملکي کسانو او د جبهې جنګیالیو ته کوم زیان نه دی اوښتی.
د مقاومت او ازادۍ جبهې له تېرو نږدې څلورو کلونو راهیسې ادعا کوي، چې د هېواد په بېلابېلو برخو کې یې سلګونه طالبان وژلي دي، خو طالبانو هېڅکله د یادو جبهو د بریدونو په تړاو څه نه دي ویلي..
یو شمېر راپورونه بیا وایي، چې طالبانو په دې موده کې له مقاومت او ازادۍ جبهو سره د همکارۍ په تور سلګونه کسان نیولي دي او نیول شوي کسان د یادې ډلې له خوا سخت شکنجه شوي هم دي.
