د طالبانو د اطلاعاتو او کلتور وزارت د کتاب د کمېسیون یو لېست کې، چې کتابتونونو ته سپارل شوی دی، مینه مجله د ملي ګټو پرضد بلل شوې او چاپ او خرڅلاو یې ممنوع شوی دی. د مینې مجلې مسوولین هم مني، چې دا مجله د طالبانو له لوري تړل شوې ده.
د طالبانو د اطلاعاتو او کلتور وزارت د نشراتو معاونیت تر سیوري لاندې د کتاب کمېسون یو لېست چې افغانستان انټرنشنل ته رسېدلی دی پکې د ۸۵ کتابونو او مجلو نومونه راغلي، چې طالبانو بندیز پرې لګولی دی.
مینه مجله چې په پښتو ژبه یې فرهنګي، ادبي او هنري مسایل تر پوښښ لاندې راوستل، په دغه لېست کې شامله ده.
د مینې مجلې د مسوولینو په وینا، دا مجله په ۱۳۸۱ کال کې پیل شوې وه او په ۱۳۸۲ کې یې له اطلاعاتو او کلتور وزارت څخه جواز اخیستی و.
تر اوسه پورې ددې مجلې ۸۹ ګڼې چاپ شوې دي او درې ګڼې د طالبانو په روانه واکمنۍ کې چاپ شوې وې.
د مجلې مسوولینو د طالبانو په روانه واکمنۍ کې غوښتل چې د مجلې تر سلو پورې ګڼې د پوست له لارې بهرنیو هېوادونو ته ولېږي خو طالبانو یې مخه نیولې او ورته ویل شوي چې دا مجله «ممنوع الخروج» ده.
مینه مجله په تېر جمهوریت کې هم درې ځله بنده شوې او بیا بېرته پرانیستل شوې وه.
یو شمېر لیکوالانو او هېوادوالو په وار - وار د طالبانو په ورته کړنو نیوکې کړي او ویلي یې دي چې که څه هم پر افغانستان د طالبانو له واکمنۍ وروسته د کتاب لوستلو دود کمرنګه شوی، خو د طالبانو په دغو بندیزونو سره به په هېواد کې د کتاب او مجلو لوستلو فرهنګ په بشپړه توګه له منځه ولاړ شي.
طالبانو له دې وړاندې د سلګونو نورو سیاسي، تاریخي، ټولنیزو او دیني کتابونو لېستونه خپاره کړي، چې د هغوی پر خپراوي، واردولو، چاپ او خرڅلاو پکې بندیز لګول شوی.
