طالبان وایي د تورغونډۍ بندر د پراختیا عملي چارې به ژر پیل شي
د ترکمنستان د اورګاډي ادارې رییس قربانوف سردار په مشرۍ یو لوړپوړی پلاوی هرات ته تللی او د دغه ولایت له والي شیخ مولانا نوراحمد اسلامجار سره یې د تورغونډۍ بندر پر پراختیا خبرې کړې دي.
د طالبانو تر واک لاندې باختر اژانس د سې شنبې په ورځ راپور ورکړی، چې په دې لیدنه کې د تورغونډۍ بندر د پراختیا، نویو هنګرونو جوړولو او د ګډو همکاریو د پیاوړتیا په اړه خبرې شوې دي.
د هرات ولایت ویاند مفتي محمد یوسف سعیدي وايي، ترکمن پلاوي د یاد بندر د پراختیا لپاره د سروې او تخنیکي مطالعاتو د ژر پیل ډاډ ورکړی او له سیمهییزې ادارې یې د لازمې همکارۍ غوښتنه کړې ده.
تر دې مخکې، د طالبانو د ټولګټو وزیر محمدعیسی ثاني په کابل کې د ترکمنستان له سفیر خواجه عوضوف سره په خپل کاري دفتر کې د لیدنې پرمهال د تورغونډۍ بندر د عملي کار پر پیلېدو خبرې کړې وې.
تورغونډۍ بندر د افغانستان او ترکمنستان ترمنځ له مهمو سوداګریزو بندرونو ګڼل کېږي، چې د پراختیا له لارې به یې د دواړو هېوادونو ترمنځ اقتصادي او ترانزیټي اړیکې لا پیاوړې شي.