صالح: ملا هبتالله د روان کال لپاره ۷۳۰ میلیون ډالره د طالبانو دفاع وزارت ته ځانګړي کړي
د مخکني جمهوري نظام د ولسمشر لومړی مرستیال امرالله صالح وایي، چې د طالبانو مشر ملا هبتالله د روان مالي کال لپاره یوازې د دغې ډلې دفاع وزارت ملېشو ته ۷۳۰ میلیون ډالره ځانګړي کړي دي.
نوموړي پر اېکس پاڼه په دې تړاو د زرغون بهیر راپور په خپرولو سره لیکلي، چې د طالبانو تر واک لاندې افغانستان هر کال ۲.۵ میلیارد ډالره عواید راټولوي او شاوخوا ۳۰ سلنه یې د دغې ډلې دفاع وزارت کې د طالبانو ملیشو ته ځانګړې کېږي.
هغه زیاته کړې، که چېرې هبتالله یوازې د خپلې ملیشې جوړښت لپاره د ملي عوایدو شاوخوا ۷۰ سلنه کاروي؛ نو د هر ډول بشري مرستو غوښتنه د منلو نه ده.
هغه وړاندې ادعا کړې، چې د امریکا کانګرس تر دې دمه په دې کې پاتې راغلی، چې طالبانو ته له ۴۰ څخه تر ۶۰ مېلیون ډالرو پورې د اونیزې نغدي کڅوړې د لېږد مخه ونیسي.
ښاغلي صالح په خپل یادښت کې ویلي: «د دوحې تړون د پټو ضمیمو له امله چې د ناټو په ملاتړ کودتاه ته ورته یوه دسیسه وه، د افغانستان جمهوري نظام یې وپرځاوه.»
نوموړي دغه څرګندونې د زرغون بهیر د راپور هغې برخې ته په اشارې سره کړې دي، چې له مخې یې د دوحې تړون د پټو ضمیمو پر بنسټ امریکا د بشري مرستو په نوم د طالب ملیشتو د لګښتونو د تامینولو ژمنه کړې ده.
د زرغون بهیر په راپور کې راغلي، چې د دغه تړون له مخې د افغاني پاسپورټونو او د پېسو چاپ واک هم د امریکا سره دی.
راپور زیاتوي، چې له ۲۰۲۱ کال راهیسې امریکا طالبانو ته په اوونۍ کې د لسګونه مېلیون ډالرو نغدي کڅوړو سربېره، ۲۵۰ مېلیارده افغانۍ هم د دوی په واک کې ورکړې دي.
له بل پلوه د زرغون بهیر په راپور کې راغلي، چې ملا هبتالله د سږني مالي کال لپاره د بودجې پنځوس میلیارده افغانۍ چې شاوخوا ۷۳۵ مېلیونه ډالر کېږي؛ هغو ملیشو ته ځانګړې کړې دي، چې د طالبانو په نوم د دفاع وزارت سره ثبت شوي، چې له دې سره د ملي عوایدو شاوخوا ۳۰ سلنه د طالبانو دفاع وزارت ته ورکول کېږي.