جرمني د انساني قاچاق شبکه نیولې ده
د جرمني پولیسو د انساني قاچاق پر یوې شکمنې شبکې عملیات کړي، چې ګومان کېږي د چین شتمن وګړي یې د جعلي اسنادو له لارې جرمني ته بېولي دي.
د جرمني پولیسو د انساني قاچاق پر یوې شکمنې شبکې عملیات کړي، چې ګومان کېږي د چین شتمن وګړي یې د جعلي اسنادو له لارې جرمني ته بېولي دي.
دا عملیات د چهارشنبې په ورځ (د می۲۱مه) د دغه هېواد په ۹ فدرالي ایالتونو کې ترسره شول، چې پکې نږدې ۴۰ ودانۍلټول شوې. د څارنوالانو په وینا، دا عملیات د فلېنسبورګ څارنوالۍ د روانو څېړنو یوه برخه ده.
درې شکمن کسان د شلیسویګ هولشتاین په ایالت کې نیول شوي، چې ګومان کېږي دا شبکه له همدې ځایه اداره کېده. د پولیسو د معلوماتو له مخې، دغه کسان تورن دي چې د چین شتمنو اتباعو ته یې د ماهرو کارکوونکو لپاره ځانګړې شوې ویزې برابرولې او داسې ښودل کېدل چې دوی به په جرمني کې کار کوي، حال دا چې هغوی د دې کار وړتیا نه لرله.
څېړنې ښيي چې نږدې ۱۰۰ کسان، چې د هغوی کورنۍ هم پکې شاملې دي، د دې جعلي اسنادو له لارې جرمني ته داخل شوي دي.
په ورته وخت کې، د شمالي راین ویسټفالن ایالت پلټونکي هم پر یوې بلې ورته شبکې کار کوي. شک کېږي چې دې ډلې د چین او عمان شتمنو وګړو ته د لوړو رشوتونو په بدل کې د اقامت اسناد برابر کړي دي.
