د امریکا د بهرنیو چارو وزیر مارکو روبیو د چارشنبې په ورځ د استازو جرګې د بهرنیو اړیکو کمیټې ته په تور نوملړ کې د طالبانو د شاملولو په تړاو وویل، چې واشنګټن له طالبانو نه د القاعدې او نورو ډلو پرضد لا ډېره همکاري غواړي.
مارک روبیو وویل، « زه باور لرم چې دا ډلبندي اوس بیاځلې تر ارزونې لاندې ده. لکه څنګه چې تاسې پوهیږئ، موږ په تېرو څو اونیو کې ځینې پرمختګونه لرلي دي او ځینې امریکایان چې بندیان وو، خوشې شوي دي، خو موږ به ځینې پریکړې وکړو».
نوموړي د دې ډلبندۍ په اړه وویل، چې دا به په بشپړه توګه د افغانستان په تړاو د امریکا د راتلونکي پالیسۍ پر بنسټ وشي.
نوموړي زیاته کړه، «موږ په دې پوهیږو چې طالبان څوک دي، موږ او دوی تېرو وختونو کې څه کړي دي. موږ غواړ چې له هغوی څخه د القاعدې او نورو عناصرو په اړه لا ډیره همکاري تر لاسه کړو. هغه عناصر چې موږ غواړو هدف یې وګرځوو».
مارک روبیو زیاته کړه، چې دا د هغې وسیلې یوه برخه ده چې ولسمشر یې د دوی له خوا د همکارۍ زیاتولو لپاره کاروي.
د ټینیسي ایالت استازي ټیم برچټ د پوښتنې په ځواب کې چې امریکا څه ډول ډاډ ولري، چې د طالبانو یا نورو ترهګرو ډلو له لوري چې په افغانستان کې مېشتې دي یا روزل کیږي، برید نه کیږي، مارک روبیو وویل:«ښه دا هغه څه دي چې موږ یې هره ورځ ډاډمن کولو ته اړتیا لرو او په څرګنده توګه د دفاع وزارت مسوولیت دی. موږ له همدې امله په افغانستان کې ډیپلوماټیک حضور نه لرو، ځکه موږ په او سني حالت کې دا نه احساسوو، چې هلته خپل پرسونل په سمه توګه خوندي کړو».
هغه زیاته کړه، چې ولسمشر ټرمپ د افغانستان له وضعیت نه ښه خبر دی او د خپلې لومړۍ دورې ولسمشرۍ پرمهال د یوې داسې هوکړې لپاره په خبرو اترو کې ډیر ښکیل و، چې امریکایان یې خوندي وساتل.
نوموړي وویل، « زه فکر کوم هغه بیا لیوالتیا لري څو ډاډ ترلاسه کړي چې افغانستان هیڅکله د بهرنیو بریدونو د پل ځای نه شي، په ځانګړې توګه د هغو بریدونو چې پر امریکایانو په نړۍ کې یا د امریکا دننه وشي».
