دا مطلب چې د «ناورینونو نوملړ» تر سرلیک لاندې خپور شوی، څو مهم مسایل په ګوته کوي او د تاوتریخوالي کمېدو او سولې ته د رسېدو په برخه کې یې د اروپايي ټولنې مهم رول ته شاره کړې ده.
۱. د ټرمپ په واکمنېدو سره د امریکا او اروپا تر منځ د اړیکو ترینګلتیا
په مطلب کې راغلي چې د امریکا د ولسمشر په توګه د ډونالډ ټرمپ بیا ټاکل کېدو د اروپا او امریکا ترمنځ اړیکې یوه حساس پړاو ته رسولې دي. د ناټو، اوکراین او منځني ختیځ پر وړاندې د ټرمپ د ناسمو اقداماتو اروپا دې ته اړ کړې چې خپله دفاعي او ډېپلوماتیکه خپلواکي پیاوړې کړي. که څه هم امنیتي همکاري لا تر اوسه په بشپړه توګه نه ده ماته شوې، خو متقابل باور کمزوری شوی دی.
۲. د غزې اندېښمنونکی وضعیت
اروپايي ټولنه وايي چې د غزې جګړه باید سملاسي پای ته ورسېږي او بشرپاله مرستو ته باید په بشپړه توګه د ننوتلو اجازه ورکړل شي. دغې ټولنې خبرداری ورکړی چې ښايي پر اسراییل د فشار راوړلو لپاره له دغه هېواد سره پر سوداګریزو تړونونو بیاکتنه وکړي.
۳. له پاکستانه د افغان کډوالو ایستل
دغه راپور د افغانستان-پاکستان په برخه کې له پاکستانه د افغانانو د ډلهییز ایستلو پر وړاندې جدي خبرداری ورکړی دی. د ناورین ډلې په وینا، تر ۸۰۰ زرو ډېر افغانان له دغه هېواده د جبري ایستلو له خطر سره مخ دي. د دغه بنسټ، په وینا دا خلک یو داسې هېواد ته لېږل کېږي چې د بشري ناورین او شدیدې بېوزلۍ تر فشار لاندې دی. په راپور کې ویل شوي، اروپايي ټولنه باید له پاکستانه وغواړي چې د کډوالو ایستل ودروي او د هغوی، په ځانګړې توګه د ښځو، نجونو او خبریالانو حقونو ته درناوی وکړي.
۴. د ارمنستان او اذربایجان ترمنځ جګړې بیا پیلېدل
د قفقاز په سیمه کې د ارمنستان او اذربایجان ترمنځ د سولې د تړون د لاسلیک هڅې د ارمنستان د اساسي قانون پر سر د اختلافاتو لامل ګرځېدلي دي.راپور کې راغلي چې اروپايي ټولنه باید د پخلاینې د ترلاسهکېدو او د بیا جګړې د خطر کمېدو لپاره د منځګړيتوب رول ولوبوي.
د نړۍوال ناورین ټيم یا International Crisis Group)) د نړۍ یو له پېژندل شویو خپلواکو څېړنیزو بنسټونو نه دی چې د جګړو، ناورینونو او بشري ستونزو په تړاو له سیمهییزو څېړنو او شواهدو کار اخلي او د سولهییز حل لپاره د سیاست سلا مشورې وړاندې کوي.
