طالبانو په هلمند کې له ملایانو غوښتي چې د ګوزڼ واکسینو لپاره عامه پوهاوی وکړي
د طالبانو د پولیو له منځه وړلو بېړني مرکز مشر ډاکټر عبدالقدوس بریالي په هلمند کې د یوې ناستې پر مهال له دیني عالمانو غوښتي، چې په ټولنه کې د ګوزڼ واکسینو د تطبیق لپاره عامه پوهاوی وکړي. د پولیو راتلونکی کمپاین د افغانستان په یو شمېر ولایتونو کې روانه اوونۍ پیلیږي.
هلمند او کندهار د افغانستان دوه هغه ولایتونه دي، چې د پولیو وایرس د خپریدو کچه په کې تر نورو ولایتونو ډېره ده او تېر کال په دغو ولایتونو کې مثبتې پېښې هم ډېرې وې.
افغانستان او پاکستان په نړۍ کې دوه هغه هېوادونه ګڼل کېږي، چې لا هم په کې د پولیو وحشي وایرس پاتې دی.