د افغانستان ملي لوبغاړي په ترکیه کې د موی تای په نړۍوالو سیالیو کې ګډون کوي
د افغانستان د موی تای ملي لوبډله د موی تای په نړۍوالو سیالیو کې ګډون کوي. په دغه سیالیو کې له افغان لوبډلې دوه لوبغاړي، یوه روزونکې او یو ریفري (قضاوت کوونکی) ګډون کوي.
یادې سیالۍ د ترکیې په کوربهتوب د انتالیا په ښار کې د روان کال د مئ میاشتې له ۲۳مې نېټې څخه پیل او تر ۳۰مې نېتې به دوام وکړي.
په دغو سیالیو کې به صلاح الدین صالح میرزایي د ۶۰کیلوګرام وزن په کټګورۍ کې او غلام نبي محمدي به د ۶۳.۵ کیلوګرام وزن په کټګورۍ کې د خپلو سیالانو په وړاندې د افغانستان استازیتوب وکړي.
له دغو ورزشکارانو سره، سمیرا محمدي د روزونکې په توګه او عیسی احمدي چې د افغانستان د مویتای فدراسیون عمومي منشي هم دی، د ټیم په ترکیب کې شامل دي.
همدارنګه احمدي به په دغه سیالیو کې د یوه قاضي (ITO) په توګه قضاوت کوي.
د ۲۰۲۵ کال د مویتای نړۍوالې سیالۍ چې له ۱۰۰ هېوادونو څخه د شاوخوا ۶۳۰ ورزشکارانو په ګډون ترسره کېږي، د دغې ورزشي رشتې له مهمو نړۍوالو سیالیو څخه شمېرل کېږي.