له خبریالانو د ملاتړ سازمان: افغانستان کې دننه ټولې رسنۍ له سخت سانسور سره مخ دي
د افغانستان له خبریالانو د ملاتړ سازمان مشر حامد عبیدي وايي، چې د بیان د ازادۍ په اړه د طالبانو ادعاوې ناسمې دي او په کور دننه رسنۍ له سخت سانسور سره مخ دي.
د افغانستان له خبریالانو د ملاتړ سازمان مشر حامد عبیدي وايي، چې د بیان د ازادۍ په اړه د طالبانو ادعاوې ناسمې دي او په کور دننه رسنۍ له سخت سانسور سره مخ دي.
هغه په ترکیه کې د انتالیا بهیر په غونډه کې زیاته کړې، چې رسنۍ د طالبانو د اطلاعاتو او کلتور وزارت او د دغې ډلې د استخباراتو لهخوا تر سخت فشار لاندې دي.
د هغه په وینا، طالبانو د خبریالانو لپاره سرې کرښې ټاکلې دي، چې له هغې څخه تېرېدل د خبریالانو د ډبولو او زنداني کېدو په معنا دي.
ښاغلي عبیدي یادونه کړې، چې یو شمیر رسنیو خپل فعالیتونه بند کړي او ځینو خبریالانو د بیان د ازادۍ د ارزښتونو د ساتنې له امله له دغه مسلک څخه لاس اخیستی دی.
سربېره پردې هغه ویلي دي، چې طالبان هڅه کوي د هغو رسنیو له لارې چې دوی یې کنټرولوي وضعیت عادي وښیي.
وروسته له هغه چې طالبان یو ځل بیا په افغانستان کې واک ته ورسېدل، یو شمیر رسنیو د دې ډلې لهخوا د لګول شویو محدودیتونو له امله خپل فعالیتونه ودرول، او ډیری خبریالان، په ځانګړې توګه ښځې اړې شوې چې خپل مسلک پریږدي.
بلخوا د بښنې نړیوال سازمان او نورو نړیوالو بنسټونو په بیا بیا د افغانستان د خبریالانو او رسنیو پر وضعیت اندېښنه ښودلې ده.
د یادولو وړ ده، چې د ۲۰۲۵ کال د رسنیو د ازادۍ د نړیوالې ډلبندۍ له مخې، افغانستان له ۱۸۰ هېوادونو څخه یوازې ۱۷.۸۸ نمرې ترلاسه کړې او په ۱۷۵مه درجه کې ځای لري.
