د روسیې د امنیتي خدمتونو فدرالې ادارې پر طالبانو بندیزونه رسمي وځنډول

د روسیې د امنیتي خدمتونو فدرالې ادارې د طالبانو پر فعالیتونو د بندیز موقتي ځنډ رسما عملي کړی او د ترهګرو ډلو په نوملړ کې یې د طالبانو پر ډله بندیزونه ځنډولي دي. د روسیې د امنیتي خدمتونو فدرالي اداره وايي، چې دا پرېکړه د روسیې د سترې محکمې د پرېکړې پر اساس شوې ده.

د روسیې د امنیتي خدمتونو فدرالي ادارې (FSB) له لوري تازه خپور شوی لیست دا تاییدوي چې طالبان نور د مسکو د ترهګرو سازمانونو په نوملړ کې شامل نه دي.

په دغه نوملړ کې ۶۲ سازمانونه لیدل کیږي، چې په روسیه کې یې فعالیت بند دی.

د روسیې سترې محکمې د ۲۰۲۵ کال د اپرېل په ۱۷مه پرېکړه کړې وه، چې دا پرېکړه د می په ۲۰مه نافذه شوه».

د اپرېل پر۱۷مه، د روسیې سترې محکمې د دغه هېواد د لوی څارنوال ایګور کرسنوف دا وړاندیز ومانه، چې په روسیه کې د طالبانو پر فعالیتونو بندیز وځنډول شي.

د طالبانو د قضیې شمېرې(AKPI25-174s) ته اوس په دغه تازه نوملړ کې لیکل شوي، چې «چې د فعالیتونو ممنوعیت وځنډېد».

د طالبانو او روسیې ترمنځ اړیکې په دې وروستیو کې نږدې شوې او ددې ډلې پلاوي د مسکو په ناستو او رسمي غونډو کې ګډون کوي.

د کازان په غونډه کې د طالبانو بیرغ هم د نورو بیرغونو ترڅنګ اېښودل شوی و، خو له اعتراضونو وروسته د فورم سمبالوونکو بیرغ بېرته لرې کړ.