په داسې حال کې چې د شلاوریز کرکټ په نړۍ کې توپ وهونکي زیاتره وخت د اتلولیو اصلي ستوري ګڼل کېږي، یو افغان توپ اچوونکي راشد خان دغه تګلاره له ننګونو سره مخ کړې. نوموړی نه یوازې د نړۍ تر ټولو مخکښ ویکټاخیستونکی دی، بلکې د یو شمېر مهمو لیګونو د اتلولیو مهم عنصر هم پاتې شوی.
راشد خان، چې اوس مهال د نړیوالو شلاوریزو سیالیو تر ټولو ډېرې ۴۷۳ ویکټې لري، په ۶،۶۰ اقتصادي نرخ سره لوبې کړې، او دا شمېرې د یو داسې فارمېټ لپاره بېساري بلل کېږي چې زیات تمرکز پکې پر توپوهنه وي.
په نړیواله کچه د اي ایس پي این کرکټ اینفو د کرکټ ۲۵ غوره شلاوریزو لوبغاړو په یوه تازه تحلیل کې، یوازې پنځه بالرانو ته ځای ورکړل شوی، خو راشد خان نه یوازې د دې لیست په سر کې راغلی، بلکې یوازینی بالر دی چې دومره لوړې کچې ته رسیدلی.
راشد خان تر دې دمه په شپږو نړیوالو لیګونو کې له ۲۰ زیاتې لوبې کړې او یوازې په یوه کې یې د هر اور منډې له اوو پورته شوې دي.
نوموړي د هند لیګ د حېدراباد لپاره په ۶،۳۳ اقتصادي نرخ په پنځو فصلونو کې ۹۳ ویکټې واخیستې.
د کرکټ شنونکي وايي چې راشد خان لګسپین توپاچونې ته یو نوی لوری ورکړی.
د راشد تخنیکي توپیرونه لکه غیر معمولي اکشن، د ګوتو له پاسه توپ نیونه او سرعت هغه یو بېساری توپ اچوونکی ګرځولی.
کرکټ اینفو وايي، د ۲۰۱۶ او ۲۰۲۲ کلونو ترمنځ، راشد په ۲۶ نړیوالو سیالیو کې یوازې په دوو کې د ۲۵ نه لوړ ویکټاوسط درلود.
که څه هم عام باور دا دی چې توپ وهونکي لوبې او جامونه ګټي، د راشد خان شتون دا دودیز درک بدل کړی.